അമേരിക്കൻ വിമാനവാഹിനിക്കപ്പലായ യു.എസ്.എസ്. ഏബ്രഹാം ലിങ്കണ് നേരെ മിസൈൽ-ഡ്രോൺ ആക്രമണം നടത്തിയെന്ന അവകാശവാദവുമായി ഇറാന്റെ റെവല്യൂഷണറി ഗാർഡ് രംഗത്തെത്തി. തങ്ങളുടെ ആക്രമണത്തിൽ കപ്പലിന് കനത്ത നാശനഷ്ടങ്ങൾ സംഭവിച്ചുവെന്നും ഭയന്നുപോയ കപ്പൽ മേഖലയിൽ നിന്ന് ഇന്ത്യൻ മഹാസമുദ്രത്തിലേക്ക് പിൻവാങ്ങിയെന്നും ഐ.ആർ.ജി.സി അവകാശപ്പെട്ടു. എന്നാൽ, ഈ വാദങ്ങളെ പൂർണ്ണമായും തള്ളിയ അമേരിക്കൻ പ്രതിരോധ കേന്ദ്രമായ പെന്റഗൺ, പടക്കപ്പൽ സുരക്ഷിതമാണെന്നും നിശ്ചയിച്ച ദൗത്യങ്ങളുമായി മുന്നോട്ട് പോകുകയാണെന്നും വ്യക്തമാക്കി.
അതേസമയം, മേഖലയിലെ സംഘർഷം അവസാനിപ്പിക്കാനായി അഞ്ചിന നിർദ്ദേശങ്ങളോ വെടിനിർത്തൽ പദ്ധതിയോ മുന്നോട്ട് വെച്ചിട്ടില്ലെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി അറിയിച്ചു. സമാധാന പുനഃസ്ഥാപനത്തിനായി അമേരിക്കയുമായി നിലവിൽ യാതൊരുവിധ ചർച്ചകളും നടക്കുന്നില്ലെന്നും അദ്ദേഹം കൂട്ടിച്ചേർത്തു. ഇറാൻ വെടിനിർത്തൽ ആവശ്യപ്പെട്ടെന്ന ട്രംപിന്റെ സോഷ്യൽ മീഡിയ പോസ്റ്റുകൾ തള്ളിക്കൊണ്ടാണ് ഇറാൻ ഔദ്യോഗികമായി തങ്ങളുടെ നിലപാട് വ്യക്തമാക്കിയത്.
Also Read: അമേരിക്കൻ ജനതയ്ക്ക് ഇറാൻ്റെ കത്ത്; ശത്രുത ജനങ്ങളോടല്ലെന്ന് പ്രസിഡന്റ് മസൂദ് പെസഷ്കിയാൻ
ഇതിനിടെ, ഇറാൻ യുദ്ധത്തിൽ നിന്ന് അമേരിക്ക ഉടൻ പിൻവാങ്ങുമെന്ന അപ്രതീക്ഷിത പ്രഖ്യാപനവുമായി ട്രംപ് രംഗത്തെത്തി. നാളെ നടത്താനിരിക്കുന്ന നിർണ്ണായക വാർത്താസമ്മേളനത്തിന് മുന്നോടിയായി റോയിറ്റേഴ്സിന് നൽകിയ അഭിമുഖത്തിലാണ് ട്രംപ് ഇക്കാര്യം വെളിപ്പെടുത്തിയത്. ഹോർമുസ് കടലിടുക്കിന്റെ നിയന്ത്രണത്തിനായി നാറ്റോ സഖ്യം സൈന്യത്തെ അയക്കാത്തതിൽ അതൃപ്തി പ്രകടിപ്പിച്ച ട്രംപ്, സഖ്യത്തിൽ നിന്ന് അമേരിക്ക പുറത്തുപോകുമെന്ന സൂചനയും നൽകി. സഖ്യകക്ഷികളുടെ പിന്തുണ ലഭിക്കാത്ത പശ്ചാത്തലത്തിൽ അമേരിക്കയുടെ പിന്മാറ്റം ആഗോള രാഷ്ട്രീയത്തിൽ വലിയ മാറ്റങ്ങൾക്ക് വഴിവെച്ചേക്കാം.
The post അമേരിക്കൻ പടക്കപ്പലിന് നേരെ ആക്രമണമെന്ന് ഇറാൻ: എബ്രഹാം ലിങ്കൺ തകർത്തുവെന്ന് റെവല്യൂഷണറി ഗാർഡ് appeared first on Express Kerala.
