ചെപ്പോക്കിലെ സ്വന്തം തട്ടകത്തിലും അടിപതറി ചെന്നൈ സൂപ്പർ കിംഗ്സ്. ഐപിഎല്ലിൽ പഞ്ചാബ് കിംഗ്സിനോട് അഞ്ച് വിക്കറ്റിനാണ് ചെന്നൈ പരാജയപ്പെട്ടത്. ചെന്നൈ ഉയർത്തിയ 210 റൺസ് എന്ന കൂറ്റൻ വിജയലക്ഷ്യം എട്ട് പന്ത് ബാക്കിനിൽക്കെ അഞ്ച് വിക്കറ്റ് നഷ്ടത്തിൽ പഞ്ചാബ് മറികടന്നു. സീസണിൽ ചെന്നൈ വഴങ്ങുന്ന തുടർച്ചയായ രണ്ടാം തോൽവിയാണിത്, അതേസമയം പഞ്ചാബ് തങ്ങളുടെ രണ്ടാം വിജയം ആഘോഷിക്കുകയും ചെയ്തു.
ആദ്യം ബാറ്റ് ചെയ്ത ചെന്നൈ നിശ്ചിത 20 ഓവറിൽ അഞ്ച് വിക്കറ്റ് നഷ്ടത്തിലാണ് 209 റൺസ് നേടിയത്. യുവതാരം ആയുഷ് മാത്രെയുടെ അർധ സെഞ്ച്വറിയും ശിവം ദുബെയുടെ വെടിക്കെട്ട് പ്രകടനവുമാണ് ചെന്നൈയ്ക്ക് മികച്ച സ്കോർ സമ്മാനിച്ചത്. എന്നാൽ ചെന്നൈ നിരയിൽ മലയാളി താരം സഞ്ജു സാംസൺ തുടർച്ചയായ രണ്ടാം മത്സരത്തിലും പരാജയപ്പെട്ടത് ആരാധകരെ നിരാശരാക്കി. അൻഷുൽ കാംബോജും നൂർ അഹമ്മദും രണ്ട് വിക്കറ്റ് വീതം വീഴ്ത്തി ചെന്നൈയ്ക്കായി പൊരുതിയെങ്കിലും പഞ്ചാബ് ബാറ്റർമാരെ പിടിച്ചുകെട്ടാനായില്ല.
ക്യാപ്റ്റൻ ശ്രേയസ് അയ്യരുടെ തകർപ്പൻ ബാറ്റിങ്ങാണ് പഞ്ചാബിന്റെ വിജയം എളുപ്പമാക്കിയത്. 29 പന്തിൽ 50 റൺസ് നേടി അദ്ദേഹം ടീമിനെ മുന്നിൽ നിന്ന് നയിച്ചു. പ്രഭ്സിമ്രാൻ സിംഗ് (43), പ്രിയാൻഷ് ആര്യ (39), കൂപ്പർ കോണോലി (36) എന്നിവരും മികച്ച പ്രകടനം പുറത്തെടുത്തു. അവസാന ഓവറുകളിൽ ശശാങ്ക് സിംഗും മാർക്കസ് സ്റ്റോയിനിസും ചേർന്ന് പഞ്ചാബിനെ അനായാസം വിജയതീരത്തെത്തിച്ചു.
The post പഞ്ചാബിന്റെ ‘പടയോട്ടം’; ചെന്നൈയ്ക്ക് തുടർച്ചയായ രണ്ടാം തോൽവി, ശ്രേയസ് അയ്യർക്ക് തിളക്കമാർന്ന വിജയം appeared first on Express Kerala.
