‘യഥാർത്ഥത്തിൽ ഞാൻ സഞ്ചരിച്ച രണ്ടാമത്തെ വിമാനമാണ് കൂടുതൽ അപകടസാധ്യത നേരിട്ടത്’: വിമർശനങ്ങൾ നേരിട്ടതിന് പിന്നാലെ ട്രംപ്

വാഷിംഗ്ടൺ: ഇറാനിൽ നിന്നുള്ള വധഭീഷണിയെത്തുടർന്ന് തുർക്കിയിൽ വെച്ച് അതീവ രഹസ്യമായി വിമാനം മാറി സഞ്ചരിച്ച തന്റെ നാടകീയ നീക്കങ്ങളെ ന്യായീകരിച്ച് യു.എസ് പ്രസിഡന്റ് ഡൊണാൾഡ് ട്രംപ്. തുർക്കിയിൽ നടന്ന ഉച്ചകോടിക്ക് ശേഷം ഔദ്യോഗിക വിമാനമായ ‘എയർഫോഴ്സ് വൺ’ ശത്രുക്കളെ പറ്റിക്കാനുള്ള ഒരു ഡെക്കോയ് ആയി മാത്രം നിലനിർത്തിയാണ് ട്രംപ് രഹസ്യമായി മറ്റൊരു വിമാനത്തിലേക്ക് മാറിയത്. ഇതിനായി അങ്കാറ അന്താരാഷ്ട്ര വിമാനത്താവളത്തിലെ ഒരു കേറ്ററിംഗ് ട്രക്കിനുള്ളിൽ ഒളിച്ചിരുന്നാണ് അദ്ദേഹം രണ്ടാമത്തെ വിമാനത്തിലേക്ക് കടന്നത്.(Donald Trump Defends Hiding In Catering Truck To Escape Iranian Threat In Turkey)

ഈ നീക്കത്തെ പരിഹസിച്ച് സമൂഹമാധ്യമങ്ങളിൽ ട്രോളുകൾ നിറഞ്ഞതോടെയാണ് ചൊവ്വാഴ്ച മാധ്യമപ്രവർത്തകരോട് ട്രംപ് പ്രതികരിച്ചത്. “യഥാർത്ഥത്തിൽ ഞാൻ സഞ്ചരിച്ച രണ്ടാമത്തെ വിമാനമാണ് കൂടുതൽ അപകടസാധ്യത നേരിട്ടത്. കാരണം ശത്രുക്കൾ എന്നെ ലക്ഷ്യമിട്ട് ആ വിമാനത്തെ ആക്രമിക്കാനായിരുന്നു സാധ്യത,” ട്രംപ് പറഞ്ഞു. പ്രസിഡന്റിന് സുരക്ഷയൊരുക്കുന്ന സീക്രട്ട് സർവീസിന്റെയും സൈന്യത്തിന്റെയും നിർദ്ദേശപ്രകാരമാണ് താൻ പ്രവർത്തിച്ചതെന്നും, അവർ ആവശ്യപ്പെട്ടതനുസരിച്ചാണ് വിമാനം മാറിയതെന്നും അദ്ദേഹം കൂട്ടിച്ചേർത്തു. തുർക്കിയിൽ നിന്നും ചെറിയൊരു സർക്കാർ വിമാനത്തിൽ യുകെയിലെത്തിയ ട്രംപ്, അവിടെ വെച്ച് ആരുമറിയാതെ വീണ്ടും എയർഫോഴ്സ് വണ്ണിൽ തിരിച്ചുകയറുകയായിരുന്നു.

അതേസമയം, ഈ രഹസ്യ ഓപ്പറേഷനെതിരെ യു.എസിൽ വലിയ രാഷ്ട്രീയ പ്രതിഷേധം ഉയരുകയാണ്. സെനറ്റിലെ ഡെമോക്രാറ്റിക് ലീഡർ ചക്ക് ഷൂമർ സംഭവത്തിൽ അടിയന്തര വിശദീകരണം ആവശ്യപ്പെട്ടു. “ഇറാൻ ഭീഷണിയെക്കുറിച്ചും പ്രസിഡന്റിനെ തുർക്കിയിൽ നിന്ന് മാറ്റാൻ സ്വീകരിച്ച അസാധാരണ നടപടികളെക്കുറിച്ചും സെനറ്റിന് ഉടൻ വിശദീകരണം നൽകണം. കോൺഗ്രസിനെ ഇരുട്ടിൽ നിർത്തി മാധ്യമങ്ങളിലൂടെ ഇത്തരം ഗുരുതരമായ വിവരങ്ങൾ പുറത്തുവരുന്നത് അംഗീകരിക്കാനാവില്ല,” ഷൂമർ പ്രസ്താവനയിൽ പറഞ്ഞു. മാധ്യമപ്രവർത്തകരെയും വൈറ്റ് ഹൗസ് ജീവനക്കാരെയും അപകടസാധ്യതയുള്ള വിമാനത്തിൽ ഇരുത്തി ട്രംപ് ഒളിച്ചുകടന്നത് സ്വാർത്ഥതയാണെന്ന വിമർശനവും ഉയരുന്നുണ്ട്.

Story Summary

US President Donald Trump defended a secret operation where he hid inside an airport catering truck to switch planes in Turkey due to an Iranian threat. The move, which used Air Force One as a decoy, has sparked political backlash from Democrats and critics over lack of transparency.