പണി കിട്ടി, കൊടുത്തത് ആര്..! സമരത്തിനായി ബുക്ക് ചെയ്ത പ്രത്യേക ട്രെയിൻ റദ്ദാക്കി റെയിൽവേ; കടുത്ത പ്രതിഷേധവുമായി സിപിഐ

കേന്ദ്ര സർക്കാരിനെതിരെ ഡൽഹിയിൽ നടക്കാനിരിക്കുന്ന പ്രതിഷേധ സമരത്തിന് പ്രവർത്തകരെ എത്തിക്കാൻ സിപിഐ ബുക്ക് ചെയ്തിരുന്ന പ്രത്യേക ട്രെയിൻ റെയിൽവേ യാതൊരു മുന്നറിയിപ്പും കൂടാതെ റദ്ദാക്കി. സെപ്റ്റംബർ ഒന്നിന് ഡൽഹിയിൽ നടക്കുന്ന സമരത്തിൽ പങ്കെടുക്കാൻ കേരളത്തിൽ നിന്ന് ആളുകളെ കൊണ്ടുപോകാൻ വേണ്ടിയാണ് 22 ബോഗികളുള്ള പ്രത്യേക ട്രെയിൻ പാർട്ടി ബുക്ക് ചെയ്തിരുന്നത്. എന്നാൽ കാരണം വ്യക്തമാക്കാതെ ഐആർസിടിസി ഏജൻസി പണം തിരികെ നൽകുകയും ട്രെയിൻ റദ്ദാക്കുകയും ചെയ്തതോടെ കടുത്ത പ്രതിഷേധവുമായി സിപിഐ നേതൃത്വം രംഗത്തെത്തിയിരിക്കുകയാണ്.

തമിഴ്‌നാട്, തെലങ്കാന, ആന്ധ്ര പ്രദേശ് എന്നീ സംസ്ഥാനങ്ങളിലും സമാനമായ രീതിയിൽ ട്രെയിനുകൾ റദ്ദാക്കപ്പെട്ട അവസ്ഥയാണെന്ന് സിപിഐ സംസ്ഥാന സെക്രട്ടറി ബിനോയ് വിശ്വം വ്യക്തമാക്കി. ട്രെയിനിന്റെ സ്റ്റോപ്പുകൾ സംബന്ധിച്ച് വിവിധ നേതാക്കൾ കഴിഞ്ഞ ദിവസങ്ങളിൽ റെയിൽവേയുമായി നിരന്തരം ചർച്ചകൾ നടത്തിയിരുന്നുവെങ്കിലും, കഴിഞ്ഞ മൂന്ന് ദിവസമായി റെയിൽവേ അധികൃതർ ആരും ഫോണെടുക്കാത്ത സ്ഥിതിയാണുണ്ടായത്. ഇതിനിടയിലാണ് യാതൊരു ഔദ്യോഗിക അറിയിപ്പുമില്ലാതെ മുൻകൂറായി അടച്ച 10 ലക്ഷം രൂപ ഐആർസിടിസി ഏജൻസി വഴി പാർട്ടിയുടെ ബാങ്ക് അക്കൗണ്ടിലേക്ക് തിരിച്ചെത്തിയത്. കേന്ദ്രവിരുദ്ധ സമരം പൊളിക്കാനുള്ള ബോധപൂർവ്വമായ നീക്കമാണിതെന്ന് ബിനോയ് വിശ്വം ആരോപിച്ചു.

ALSO READ;കളത്തിലിറക്കിയാൽ കണ്ടുനിൽക്കുന്നവരുടെ മുട്ടിടിക്കും! പക്ഷെ ഒരു S-400 ബാറ്ററി പ്രവർത്തിപ്പിക്കാൻ ഒരാൾ പോരാ…

എന്നാൽ ഈ നടപടികൊണ്ടൊന്നും തങ്ങൾ പിന്നോട്ടില്ലെന്നും, സാധ്യമായ എല്ലാ വഴികളിലൂടെയും സിപിഐ പ്രവർത്തകർ ഡൽഹിയിൽ എത്തിച്ചേരുമെന്നും അദ്ദേഹം വ്യക്തമാക്കി. റെയിൽവേയുടെ ഈ ജാതിവിരുദ്ധ-രാഷ്ട്രീയ പ്രേരിതമായ നടപടിയിൽ പ്രതിഷേധിച്ച് നാളെ വൈകിട്ട് കേരളത്തിലെ എല്ലാ ജില്ലകളിലെയും പ്രധാനപ്പെട്ട റെയിൽവേ സ്റ്റേഷനുകളിലേക്ക് പാർട്ടി പ്രവർത്തകർ പ്രതിഷേധ മാർച്ച് നടത്തുമെന്നും ഔദ്യോഗികമായി പ്രഖ്യാപിച്ചിട്ടുണ്ട്.

ട്രെയിൻ റദ്ദാക്കപ്പെട്ടെങ്കിലും പ്രഖ്യാപിച്ച സമരവുമായി മുന്നോട്ട് പോകാൻ തന്നെയാണ് സിപിഐയുടെ തീരുമാനം.

The post പണി കിട്ടി, കൊടുത്തത് ആര്..! സമരത്തിനായി ബുക്ക് ചെയ്ത പ്രത്യേക ട്രെയിൻ റദ്ദാക്കി റെയിൽവേ; കടുത്ത പ്രതിഷേധവുമായി സിപിഐ appeared first on Express Kerala.