പ്രളയ പ്രതിരോധത്തിന് ‘കേരള ഫ്ലഡ് റെസിലിയൻസ് ഇനിഷ്യേറ്റീവ്’: മുഖ്യമന്ത്രിയുമായി കൂടിക്കാഴ്ച നടത്തി IIT വിദഗ്ധർ, സമഗ്ര രൂപരേഖ അവതരിപ്പിച്ചു

തിരുവനന്തപുരം: പ്രകൃതിദുരന്തങ്ങളെയും പ്രളയത്തെയും ശാസ്ത്രീയമായി പ്രതിരോധിക്കാൻ ‘കേരള ഫ്ലഡ് റെസിലിയൻസ് ഇനിഷ്യേറ്റീവ്’ നടപ്പാക്കാനൊരുങ്ങി സംസ്ഥാന സർക്കാർ. ഇതിന്റെ ഭാഗമായി പദ്ധതിയുടെ സമഗ്ര രൂപരേഖ തയ്യാറാക്കിയ ഐ.ഐ.ടി റൂർക്കി, ഐ.ഐ.ടി പാലക്കാട്, ഐ.ഐ.ഐ.ടി കോട്ടയം എന്നീ സ്ഥാപനങ്ങളിലെ പ്രമുഖ വിദഗ്ധ സംഘം മുഖ്യമന്ത്രിയുമായി ഉന്നതതല കൂടിക്കാഴ്ച നടത്തി.(Kerala Flood Resilience Initiative AI Technology IIT Experts Meet Chief Minister)

ആർട്ടിഫിഷ്യൽ ഇന്റലിജൻസ്, മെഷീൻ ലേണിംഗ്, റിമോട്ട് സെൻസിംഗ്, ഹൈഡ്രോഡൈനാമിക് മോഡലിംഗ് തുടങ്ങിയ അത്യാധുനിക സാങ്കേതികവിദ്യകൾ പ്രയോജനപ്പെടുത്തി തീവ്രമഴ, നഗരങ്ങളിലെ വെള്ളക്കെട്ട്, ഉരുൾപൊട്ടൽ, നദീതീര പ്രളയം എന്നിവ മുൻകൂട്ടി പ്രവചിക്കാനും മുന്നറിയിപ്പ് നൽകാനുമാണ് പദ്ധതി ലക്ഷ്യമിടുന്നത്. നദികളിലെയും തടാകങ്ങളിലെയും എക്കലും മണ്ണും നീക്കം ചെയ്യുന്നത് ജലത്തിന്റെ ഒഴുക്കിനെ എങ്ങനെ ബാധിക്കുമെന്ന് ശാസ്ത്രീയമായി പഠിച്ച ശേഷം മാത്രമേ നടപ്പാക്കാവൂ എന്നും ഐ.ഐ.ടി സംഘം ചൂണ്ടിക്കാട്ടി.

പദ്ധതിയുടെ സാങ്കേതിക പ്രായോഗികത, സാമ്പത്തിക ബാധ്യതകൾ, നടപ്പാക്കൽ രീതികൾ എന്നിവയെക്കുറിച്ച് സംയുക്തമായി പരിശോധിച്ച് ഒരു മാസത്തിനകം റിപ്പോർട്ട് സമർപ്പിക്കാൻ ജലവിഭവ, ദുരന്തനിവാരണ വകുപ്പുകൾക്ക് മുഖ്യമന്ത്രി നിർദ്ദേശം നൽകി. റവന്യൂ മന്ത്രി എ.പി. അനിൽ കുമാർ, പരിസ്ഥിതി മന്ത്രി സണ്ണി ജോസഫ്, കൃഷി മന്ത്രി ടി. സിദ്ധിഖ്, ജലവിഭവ മന്ത്രി മോൻസ് ജോസഫ്, ചീഫ് സെക്രട്ടറി ബിശ്വനാഥ് സിൻഹ ഐ.എ.എസ് തുടങ്ങിയവർ ഉന്നതതല യോഗത്തിൽ പങ്കെടുത്തു.

Story Summary

The Kerala government is preparing to implement the ‘Kerala Flood Resilience Initiative’ to scientifically tackle flood risks and climate-related disasters in the state. A team of experts from IIT Roorkee, IIT Palakkad, and IIIT Kottayam presented a comprehensive roadmap using AI and advanced technologies to Chief Minister, who subsequently instructed the Water Resources and Disaster Management departments to submit a feasibility report within a month.