ടെലിഗ്രാമിന്റെ കിടിലൻ അപ്ഡേറ്റ്! പുതിയ ഫീച്ചറുകൾ എത്തി, ഗ്രൂപ്പുകളും ചാനലുകളും ഇനി അടിമുടി മാറും

തങ്ങളുടെ 13-ാം വാർഷികത്തോടനുബന്ധിച്ച് ഉപയോക്താക്കൾക്കായി ഒട്ടനവധി പുതിയ ഫീച്ചറുകൾ ഉൾപ്പെടുത്തി പുതിയ അപ്ഡേറ്റ് പുറത്തിറക്കിയിരിക്കുകയാണ് ടെലിഗ്രാം. ഗ്രൂപ്പുകൾ, ചാനലുകൾ, സന്ദേശങ്ങൾ, സമ്മാനങ്ങൾ എന്നിവയിലെല്ലാം വലിയ മാറ്റങ്ങളാണ് കമ്പനി കൊണ്ടുവന്നിരിക്കുന്നത്. പ്രത്യേക ബോട്ടുകളുടെ സഹായമില്ലാതെ തന്നെ ഗ്രൂപ്പുകളിൽ പുതിയ അംഗങ്ങൾക്കായി സ്വാഗത സന്ദേശങ്ങൾ സജ്ജീകരിക്കാൻ സാധിക്കുന്നതാണ് ഇതിൽ ഏറ്റവും പ്രധാനപ്പെട്ട ഒരു ഫീച്ചർ. ഈ സന്ദേശങ്ങൾ പുതിയ അംഗങ്ങൾക്ക് മാത്രമായി പരിമിതപ്പെടുത്തിയിരിക്കുന്നതിനാൽ ഗ്രൂപ്പിലെ പഴയ ചാറ്റുകളെ അത് ബാധിക്കുകയുമില്ല.

കൂടാതെ, ഡെവലപ്പർമാർക്ക് ടെലിഗ്രാം സന്ദേശങ്ങളിൽ നേരിട്ട് ഇന്ററാക്ടീവ് ബട്ടണുകൾ ഉൾപ്പെടുത്താനുള്ള അവസരവും പുതിയ അപ്ഡേറ്റിലൂടെ ലഭിക്കുന്നുണ്ട്. സർവേകൾ, ഗെയിമുകൾ, ക്വിസുകൾ, ഓർഡറുകൾ എന്നിവയ്ക്കായി ഈ ബട്ടണുകൾ ഉപയോഗപ്പെടുത്താം. ഇതിനുപുറമേ, ടെക്സ്റ്റിനൊപ്പം ഡോക്യുമെന്റുകളും ഫയലുകളും സംഗീതവും നേരിട്ട് ചേർക്കാനുള്ള സൗകര്യവും റിച്ച് ടെക്സ്റ്റ് എഡിറ്ററിൽ ഉൾപ്പെടുത്തിയിട്ടുണ്ട്. ഇതുവഴി ആവശ്യമായ ഫയലുകൾ പ്രത്യേകം സന്ദേശങ്ങളായി അയക്കേണ്ട ബുദ്ധിമുട്ട് ഒഴിവാകുന്നു.

Also Read: കൗമാരക്കാരുടെ സോഷ്യൽമീഡിയ ആസക്തി; മെറ്റയ്ക്ക് 18 ബില്യൺ ഡോളറിന്റെ തിരിച്ചടി!

പഴയ ആപ്പ് പതിപ്പുകൾ ഉപയോഗിക്കുന്നവർക്കായി പുതിയ ഫീച്ചറുകൾ കാണിക്കാത്ത പക്ഷം അപ്ഡേറ്റ് ചെയ്യാനുള്ള പ്ലേസ്ഹോൾഡർ സംവിധാനവും ഒരുക്കിയിട്ടുണ്ട്. ടെലിഗ്രാം മാർക്കറ്റ്പ്ലേസിൽ നിന്ന് സ്റ്റാർസ് ഉപയോഗിച്ച് വാങ്ങുന്ന കളക്ടബിൾ സമ്മാനങ്ങൾക്കൊപ്പം പ്രത്യേക കമന്റുകളും ഒപ്പും ചേർക്കാനുള്ള സൗകര്യവും പുതിയ അപ്ഡേറ്റിലുണ്ട്. ഗ്രൂപ്പ് പ്രവർത്തനങ്ങൾ കൂടുതൽ സജീവമാക്കാനും ഉപയോക്തൃ അനുഭവം മെച്ചപ്പെടുത്താനും ലക്ഷ്യമിട്ടാണ് ടെലിഗ്രാമിന്റെ ഈ പുതിയ മാറ്റങ്ങൾ.

The post ടെലിഗ്രാമിന്റെ കിടിലൻ അപ്ഡേറ്റ്! പുതിയ ഫീച്ചറുകൾ എത്തി, ഗ്രൂപ്പുകളും ചാനലുകളും ഇനി അടിമുടി മാറും appeared first on Express Kerala.