സംസ്ഥാനത്ത് ചൂട് കൂടും; 4 ഡിഗ്രി വരെ താപനില ഉയരാൻ സാധ്യത, ജാഗ്രത നിർദേശം | Kerala heat alert

തിരുവനന്തപുരം: സംസ്ഥാനത്ത് സെപ്റ്റംബർ 8 വരെ സാധാരണയേക്കാൾ 3 മുതൽ 4 ഡിഗ്രി സെൽഷ്യസ് വരെ താപനില ഉയരാൻ സാധ്യതയുള്ളതിനാൽ (Kerala heat alert) പൊതുജനങ്ങൾ ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി നിർദേശിച്ചു. ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങിയ ആരോഗ്യപ്രശ്നങ്ങൾക്ക് കാരണമാകാൻ സാധ്യതയുള്ളതിനാൽ മുൻകരുതലുകൾ സ്വീകരിക്കണം.

പകൽ 11 മുതൽ വൈകിട്ട് 3 വരെ നേരിട്ട് വെയിൽ ഏൽക്കുന്നത് പരമാവധി ഒഴിവാക്കണം. ദാഹമില്ലെങ്കിലും ഇടയ്ക്കിടെ ധാരാളം വെള്ളം കുടിക്കണം. ORS, സംഭാരം തുടങ്ങിയവ ഉപയോഗിക്കുന്നതും ശരീരത്തിലെ ജലാംശം നിലനിർത്താൻ സഹായിക്കും.

ചൂട് കൂടുതലുള്ള സമയങ്ങളിൽ അയഞ്ഞതും ഇളം നിറത്തിലുള്ളതുമായ വസ്ത്രങ്ങൾ ധരിക്കണം. പുറത്തിറങ്ങുമ്പോൾ കുടയോ തൊപ്പിയോ ഉപയോഗിക്കാനും നിർദേശമുണ്ട്. മദ്യം, കാപ്പി, ചായ, കാർബണേറ്റഡ് പാനീയങ്ങൾ എന്നിവ ഒഴിവാക്കുന്നതാണ് ഉചിതം.

കുട്ടികൾ, പ്രായമായവർ, ഗർഭിണികൾ, കിടപ്പുരോഗികൾ എന്നിവർ പ്രത്യേക ജാഗ്രത പാലിക്കണം. തൊഴിലാളികളുടെ ജോലി സമയം ചൂട് കുറഞ്ഞ സമയങ്ങളിലേക്ക് ക്രമീകരിക്കുകയും ആവശ്യമായ വിശ്രമവും കുടിവെള്ളവും ഉറപ്പാക്കുകയും വേണം.

വിദ്യാഭ്യാസ സ്ഥാപനങ്ങളിൽ മതിയായ കുടിവെള്ളവും വായുസഞ്ചാരവും ഉറപ്പാക്കണം. പൊതുപരിപാടികൾ സംഘടിപ്പിക്കുന്നിടത്ത് തണൽ സൗകര്യവും ആവശ്യത്തിന് കുടിവെള്ളവും ഒരുക്കണമെന്നും ദുരന്ത നിവാരണ അതോറിറ്റി നിർദേശിച്ചു.

ചൂട് വർധിക്കുന്ന സാഹചര്യത്തിൽ തീപിടിത്തത്തിനും കാട്ടുതീയ്ക്കും സാധ്യതയുള്ളതിനാൽ പ്രത്യേക ജാഗ്രത വേണം. തീപിടിത്ത സാധ്യതയുള്ള പ്രദേശങ്ങളിൽ അശ്രദ്ധ ഒഴിവാക്കുകയും അധികൃതരുടെ നിർദേശങ്ങൾ പാലിക്കുകയും ചെയ്യണം.

ചൂട് മൂലം അസ്വസ്ഥത അനുഭവപ്പെട്ടാൽ ഉടൻ വൈദ്യസഹായം തേടണം. കാലാവസ്ഥാ വകുപ്പും സംസ്ഥാന ദുരന്ത നിവാരണ അതോറിറ്റിയും പുറപ്പെടുവിക്കുന്ന മുന്നറിയിപ്പുകൾ കൃത്യമായി പാലിക്കണമെന്നും നിർദേശത്തിൽ പറയുന്നു.

Story Summary: Kerala is likely to experience temperatures 3 to 4°C above normal until September 8, prompting the State Disaster Management Authority to issue a public safety advisory. People have been urged to stay hydrated, avoid direct sunlight during peak hours and take special precautions against heat-related illnesses and fire risks.