പത്തനംതിട്ട: മകരവിളക്ക് മഹോത്സവത്തിനായി അയ്യപ്പ വിഗ്രഹത്തിൽ ചാർത്താനുള്ള തിരുവാഭരണങ്ങളും വഹിച്ചുകൊണ്ടുള്ള ഘോഷയാത്ര ഇന്ന് പന്തളം വലിയ കോയിക്കൽ ക്ഷേത്രത്തിൽ നിന്ന് പുറപ്പെടും. ഉച്ചയ്ക്ക് ഒരു മണിക്ക് വാഹക സംഘം തിരുവാഭരണങ്ങൾ ശിരസ്സിലേറ്റുന്നതോടെ ചടങ്ങുകൾക്ക് തുടക്കമാകും. മരുതമനയിൽ ശിവൻകുട്ടിയാണ് ഇത്തവണ മുതൽ വാഹകസംഘത്തിന് നേതൃത്വം നൽകുന്ന ഗുരുസ്വാമി. പരമ്പരാഗതമായി ആകാശത്ത് ശ്രീകൃഷ്ണപ്പരുന്ത് വട്ടമിട്ടു പറക്കുന്നതോടെയാണ് ഘോഷയാത്ര പ്രയാണം ആരംഭിക്കുക. ഇന്ന് രാവിലെ വരെ പന്തളം ശ്രാമ്പിക്കൽ കൊട്ടാരത്തിൽ ഭക്തജനങ്ങൾക്ക് തിരുവാഭരണങ്ങൾ കണ്ടുതൊഴാനുള്ള സൗകര്യമുണ്ടായിരിക്കും. വരും ദിവസങ്ങളിൽ വിവിധ ഇടങ്ങളിലെ സ്വീകരണങ്ങൾ ഏറ്റുവാങ്ങി ബുധനാഴ്ച വൈകിട്ടാണ് തിരുവാഭരണം സന്നിധാനത്തെത്തുക. തുടർന്ന് തിരുവാഭരണം ചാർത്തിയുള്ള ദീപാരാധന നടക്കും.
അതേസമയം, മകരവിളക്ക് ദിനത്തിലെ തിരക്ക് കണക്കിലെടുത്ത് ഭക്തരുടെ എണ്ണത്തിൽ ഹൈക്കോടതി കർശന നിയന്ത്രണങ്ങൾ ഏർപ്പെടുത്തി. മകരവിളക്ക് ദിനത്തിൽ പ്രവേശനം 35,000 പേർക്ക് മാത്രമായി നിജപ്പെടുത്തിയിട്ടുണ്ട്. ഇതിൽ 30,000 പേർക്ക് വെർച്വൽ ക്യൂ വഴിയും 5,000 പേർക്ക് സ്പോട്ട് ബുക്കിങ് വഴിയുമാണ് അനുമതി നൽകുക. ജനുവരി 13-ന് വെർച്വൽ ക്യൂ വഴി 35,000 പേർക്കും സ്പോട്ട് ബുക്കിങ് വഴി 5,000 പേർക്കും പ്രവേശനം ലഭിക്കും. സുരക്ഷാ ക്രമീകരണങ്ങളുടെ ഭാഗമായി മകരവിളക്ക് ദിനത്തിൽ രാവിലെ 10 മണിക്ക് ശേഷം നിലയ്ക്കലിൽ നിന്ന് പമ്പയിലേക്കോ, 11 മണിക്ക് ശേഷം പമ്പയിൽ നിന്ന് സന്നിധാനത്തേക്കോ ഭക്തരെ കടത്തിവിടാൻ പാടില്ലെന്നും കോടതി ഉത്തരവിട്ടു.
The post തിരുവാഭരണ ഘോഷയാത്ര ഇന്ന്; മകരവിളക്ക് ദിനത്തിൽ ഭക്തരുടെ എണ്ണത്തിൽ നിയന്ത്രണം appeared first on Express Kerala.
