ബീഫ് കഴിക്കുമോയെന്ന് ചോദിച്ച് അധ്യാപകനുൾപ്പെടെ പരിഹസിച്ചു. ദലിത് വിദ്യാർഥി ജീവനൊടുക്കി

ചെന്നൈ: കോയമ്പത്തൂർ പീളമേട്ടിൽ ജാതിയുടെയും ഭക്ഷണശീലങ്ങളുടെയും പേരിൽ സ്കൂളിൽ നിരന്തരം അധിക്ഷേപം നേരിട്ടെന്ന പരാതിക്കിടെ 11ാം ക്ലാസ് വിദ്യാർഥി ആത്മഹത്യചെയ്തു. ശ്രീ കെ.കെ. നായിഡു ഹയർ സെക്കൻഡറി സ്കൂളിലെ വിദ്യാർഥി  എ. അകിലൻ (16) ആണ് ജീവനൊടുക്കിയത്.

അധ്യാപകനും സഹപാഠികളും ജാതിയുടെ പേരിലും ബീഫ് കഴിക്കുന്നതിന്റെ പേരിലും അപമാനിച്ചിരുന്നതായി കുടുംബം ആരോപിച്ചു. നേരത്തേ പിതാവ് സ്കൂൾ അധികൃതർക്ക് പരാതി നൽകിയിരുന്നെങ്കിലും അധിക്ഷേപം തുടർന്നെന്നാണ് ആരോപണം.

മാതാവ് കൗസല്യയുടെ പരാതിയിൽ സ്കൂൾ ഹെഡ്മാസ്റ്റർ, ഒരു അധ്യാപകൻ, രണ്ട് വിദ്യാർഥികൾ എന്നിവർക്കെതിരെ പൊലീസ് കേസെടുത്തു. 

പട്ടികജാതി-പട്ടികവർഗ അതിക്രമങ്ങൾ തടയൽ നിയമം ഉൾപ്പെടെയുള്ള വകുപ്പുകൾ പ്രകാരം ആത്മഹത്യാ പ്രേരണ, ഉപദ്രവം തുടങ്ങിയ ആരോപണങ്ങളിൽ അന്വേഷണം തുടരുകയാണ്.