ഫ്രാൻസിൽ പ്രതിഷേധ ഭീതി; ലൂവർ മ്യൂസിയം അടച്ചു, മൊണാലിസയെ കാണാനാകാതെ വിനോദസഞ്ചാരികൾ | Paris museum closures

ഫ്രാൻസിൽ വീണ്ടും പ്രതിഷേധങ്ങൾ ശക്തമാകുമെന്ന ആശങ്കയെ തുടർന്ന് പാരിസിലെ പ്രമുഖ മ്യൂസിയങ്ങളും സാംസ്കാരിക കേന്ദ്രങ്ങളും അടച്ചു. ലോകപ്രശസ്ത ചിത്രമായ മൊണാലിസ പ്രദർശിപ്പിച്ചിരിക്കുന്ന ലൂവർ മ്യൂസിയം അടച്ചതോടെ നിരവധി വിനോദസഞ്ചാരികൾ നിരാശരായി. പ്രതിഷേധങ്ങൾക്കിടെ അക്രമസംഭവങ്ങൾ ആവർത്തിക്കാതിരിക്കാനുള്ള മുൻകരുതലിന്റെ ഭാഗമായാണ് നടപടി. (Paris museum closures)

ജീവിതച്ചെലവ് വർധിക്കുന്നതും പൊതുസേവനങ്ങളുടെ നിലവാരം മോശമാകുന്നതും ചൂണ്ടിക്കാട്ടി കഴിഞ്ഞ ആഴ്ച രാജ്യവ്യാപകമായി നടന്ന പ്രതിഷേധങ്ങൾ ഫ്രാൻസിൽ വർഷങ്ങൾക്കിടയിലെ ഏറ്റവും വലിയ തെരുവ് അക്രമങ്ങളിലൊന്നിലേക്ക് നീങ്ങിയിരുന്നു. ഇതിന് പിന്നാലെ ചില പ്രദേശങ്ങളിൽ കർഫ്യൂ ഏർപ്പെടുത്തുകയും പൊതുസ്ഥലങ്ങളിൽ നിയന്ത്രണങ്ങൾ ഏർപ്പെടുത്തുകയും ചെയ്തു. ശനിയാഴ്ച വീണ്ടും പ്രതിഷേധങ്ങൾ നടക്കാനിരിക്കെയാണ് സുരക്ഷാ നടപടികൾ ശക്തമാക്കിയത്. ലൂവറിന് പുറമെ ഓറഞ്ചറി, ജെ ദെ പോം, പിക്കാസോ മ്യൂസിയങ്ങൾ ഉൾപ്പെടെ പാരിസിലെ നിരവധി സാംസ്കാരിക കേന്ദ്രങ്ങളും അടച്ചു. ലൂവറിന് സമീപമുള്ള ട്യൂലറീസ് ഗാർഡൻസ് സമുച്ചയവും പൂർണമായി അടച്ചിട്ടു. സുരക്ഷാ ആശങ്കകൾ ചൂണ്ടിക്കാട്ടി പാരിസ് ഓപ്പറയുടെ പാലെ ഗാർണിയർ, ഓപ്പറ ബാസ്റ്റിൽ വേദികളും പ്രവർത്തനം നിർത്തി. ആർട്ട് ബാസൽ പാരിസ് കലാമേളയുടെ വാരാന്ത്യ പരിപാടികളും റദ്ദാക്കി.

മ്യൂസിയങ്ങൾ സന്ദർശിക്കാനെത്തിയ പല വിനോദസഞ്ചാരികളും അടച്ചിട്ട കവാടങ്ങൾക്കു മുന്നിൽ നിരാശയോടെ മടങ്ങി. ചിലർക്ക് മുൻകൂട്ടി ടിക്കറ്റുകൾ വാങ്ങിയിട്ടും പ്രവേശിക്കാനായില്ല. അടച്ചിടൽ സംബന്ധിച്ച അറിയിപ്പുകൾ വെള്ളിയാഴ്ച നൽകിയിരുന്നെങ്കിലും പലരും അവ ശ്രദ്ധിച്ചിരുന്നില്ലെന്ന് സന്ദർശകർ പ്രതികരിച്ചു.
പ്രതിഷേധങ്ങളുടെ പശ്ചാത്തലത്തിൽ പാരിസിൽ സുരക്ഷാ സന്നാഹങ്ങൾ ശക്തമാക്കിയിട്ടുണ്ട്. കഴിഞ്ഞ ആഴ്ചയുണ്ടായ അക്രമങ്ങളും നാശനഷ്ടങ്ങളും കണക്കിലെടുത്ത് പൊതുജനങ്ങളുടെയും ജീവനക്കാരുടെയും സുരക്ഷ ഉറപ്പാക്കുന്നതിനാണ് നിയന്ത്രണങ്ങളെന്നാണ് അധികൃതരുടെ നിലപാട്.

Summary: Paris shut the Louvre Museum, home to the Mona Lisa, and several other cultural venues on October 24 amid fears of renewed protests and unrest. The closures followed violent demonstrations over the cost of living and deteriorating public services the previous week. The Paris Opera also suspended performances, while Art Basel Paris cancelled its weekend programme.