തമിഴ്നാട്ടിൽ അജ്ഞാത രോഗം പടരുന്നു; 50,000 കോഴികൾ ചത്തു, ദീപാവലി വിപണിക്ക് തിരിച്ചടി; വൻ നഷ്ടത്തിൽ കർഷകർ | Tamil Nadu Poultry Disease Outbreak

ചെന്നൈ: തമിഴ്നാട്ടിലെ കടലൂർ ജില്ലയിൽ കോഴിഫാമുകളിൽ അജ്ഞാത രോഗം പടരുന്നു. ആറു ദിവസത്തിനിടെ വിവിധ ഗ്രാമങ്ങളിലായി 50,000ത്തോളം കോഴികൾ ചത്തതായാണ് കർഷകരുടെ കണക്ക്. രോഗബാധയെ തുടർന്ന് കോഴികളെ കൂട്ടത്തോടെ കൊന്നൊടുക്കുകയും ചത്തവയെ കുഴിച്ചുമൂടുകയും ചെയ്യുന്നുണ്ട്. ദീപാവലി വിപണി സജീവമാകേണ്ട സമയത്തുണ്ടായ പ്രതിസന്ധി കോഴി കർഷകരെ കടുത്ത സാമ്പത്തിക പ്രതിസന്ധിയിലാക്കിയിരിക്കുകയാണ്. (Tamil Nadu Poultry Disease Outbreak)

കഴിഞ്ഞ ഒരാഴ്ചയ്ക്കിടെ 7,000 കോഴികളെ നഷ്ടപ്പെട്ട കടലൂരിലെ കർഷകനായ മോഹനാണ് പ്രതിസന്ധിയുടെ ആഴം വ്യക്തമാക്കുന്നത്. കോഴികൾ കൂട്ടത്തോടെ ചത്തൊടുങ്ങുന്നത് കണ്ട് നിസ്സഹായനായി കഴിയുകയാണ് ഇദ്ദേഹം. ഒരു കോഴിക്കുഞ്ഞിന് 47-48 രൂപയാണ് വില. 50 കിലോ കോഴിത്തീറ്റയ്ക്ക് 2,500 മുതൽ 2,600 രൂപ വരെയും വൈദ്യുതി ബില്ലിനായി മാത്രം 10,000 മുതൽ 20,000 രൂപ വരെയും ചെലവാകുന്നുണ്ട്. 40-50 ലക്ഷം രൂപ വരെ നിക്ഷേപിച്ച ഫാമുകളാണ് പ്രതിസന്ധിയിലായതെന്നും കർഷകർ പറയുന്നു. ചത്ത കോഴികളുടെ ശരീരത്തിൽ അസാധാരണമായ ലക്ഷണങ്ങൾ കാണപ്പെടുന്നതായി കർഷകർ പറയുന്നു. കാലുകൾ പിന്നിലേക്ക് നീട്ടിയ നിലയിലും ചിറകുകൾ പൂർണമായി വിടർത്തിയ നിലയിലുമാണ് പല കോഴികളെയും കണ്ടെത്തുന്നത്. രോഗത്തിന്റെ കാരണം വ്യക്തമല്ലാത്തതിനാൽ കൂടുതൽ കോഴികളിലേക്ക് രോഗം പടരുമെന്ന ആശങ്കയും ശക്തമാണ്. അതേസമയം, കർഷകർ പറയുന്ന കണക്കിനേക്കാൾ കുറവാണ് ഔദ്യോഗികമായി സ്ഥിരീകരിച്ച മരണസംഖ്യ. കടലൂർ ജില്ലയിൽ ഏകദേശം 26,000 കോഴികൾ ചത്തതായാണ് ജില്ലാ ഭരണകൂടത്തിന്റെ കണക്ക്. ആദ്യഘട്ട ലബോറട്ടറി പരിശോധനയിൽ പക്ഷിപ്പനി (ഏവിയൻ ഇൻഫ്ലുവൻസ) ഇല്ലെന്ന് സ്ഥിരീകരിച്ചതായി മുതിർന്ന ഉദ്യോഗസ്ഥൻ അറിയിച്ചു. എന്നാൽ രോഗകാരണം കണ്ടെത്താനായിട്ടില്ല.

രോഗത്തിന്റെ യഥാർഥ കാരണം കണ്ടെത്തുന്നതിനായി തമിഴ്നാട് സർക്കാർ കൂടുതൽ സാമ്പിളുകൾ ഭോപ്പാലിലെ ലബോറട്ടറിയിലേക്ക് അയച്ചിട്ടുണ്ട്. പരിശോധനാഫലം പുറത്തുവന്നാൽ രോഗവ്യാപനം തടയാനുള്ള നടപടികൾ സ്വീകരിക്കാനാകുമെന്നാണ് പ്രതീക്ഷ. സർക്കാർ ഉദ്യോഗസ്ഥരെയും മൃഗഡോക്ടർമാരെയും സമീപിച്ചിട്ടും അടിയന്തര പരിഹാരം ലഭിച്ചിട്ടില്ലെന്നാണ് കർഷകരുടെ പരാതി. ദീപാവലി കാലത്ത് വിപണിയിൽ ആവശ്യകത ഉയരുമെന്ന പ്രതീക്ഷയിലായിരുന്നു കർഷകർ. എന്നാൽ രോഗവ്യാപനം തുടരുന്നത് ശേഷിക്കുന്ന കോഴികളെയും ബാധിക്കുമെന്ന ആശങ്കയുണ്ട്. നിക്ഷേപം നഷ്ടപ്പെട്ടതിനൊപ്പം ഫാമുകളുടെ പ്രവർത്തനം നിലനിർത്തുന്നതും കർഷകർക്ക് വലിയ വെല്ലുവിളിയായി മാറിയിരിക്കുകയാണ്.

Summary: Nearly 50,000 chickens have reportedly died across several villages in Tamil Nadu’s Cuddalore district over six days due to an unidentified disease. While initial tests have ruled out bird flu, farmers face severe financial losses ahead of the Diwali season as authorities await further laboratory results.