ദാവൂദ് ഇബ്രാഹിം താമസിച്ചിരുന്ന മുംബൈയിലെ കെട്ടിടം പൊളിക്കുന്നതിന് ബോംബെ ഹൈക്കോടതിയുടെ സ്റ്റേ; നവംബർ 25 വരെ പൊളിക്കൽ നടപടികൾ നിർത്തിവയ്ക്കാൻ ഉത്തരവ്

മുംബൈ: അധോലോക കുറ്റവാളി ദാവൂദ് ഇബ്രാഹിം താമസിച്ചിരുന്ന തെക്കൻ മുംബൈയിലെ കെട്ടിടം പൊളിക്കുന്ന നടപടികൾക്ക് ബോംബെ ഹൈക്കോടതിയുടെ സ്റ്റേ. നവംബർ 25ന് വിശദമായ വാദം കേൾക്കുന്നതുവരെ പൊളിക്കൽ നടപടികൾ നിർത്തിവയ്ക്കാനും തൽസ്ഥിതി തുടരാനും കോടതി നിർദേശിച്ചു. കെട്ടിടത്തിന്റെ ഉടമസ്ഥരായ ട്രസ്റ്റുമായി ബന്ധപ്പെട്ടവർ സമർപ്പിച്ച ഹർജിയിലാണ് ഉത്തരവ്.
ചീഫ് ജസ്റ്റിസ് മഹേഷ് ചന്ദ്ര ത്രിപാഠി, ജസ്റ്റിസ് അദ്വൈത് സേത്ന എന്നിവരടങ്ങിയ ഡിവിഷൻ ബെഞ്ചാണ് കേസ് പരിഗണിച്ചത്. വിഷയത്തിൽ വിശദമായ വാദം കേൾക്കേണ്ടതുണ്ടെന്ന് നിരീക്ഷിച്ച കോടതി അതുവരെ കെട്ടിടം പൊളിക്കരുതെന്ന് നിർദേശിക്കുകയായിരുന്നു.
‘ഹാജി ഇസ്മായിൽ ഹാജി ഹബീബ് മുസാഫിർഖാന ട്രസ്റ്റ്’ എന്ന വഖ്ഫ് സ്ഥാപനത്തിന്റെ ഗുണഭോക്താക്കളാണെന്ന് അവകാശപ്പെടുന്ന രണ്ട് പേരാണ് കോടതിയെ സമീപിച്ചത്.
1864ൽ ഹജ്ജ് തീർത്ഥാടകർക്ക് വിശ്രമകേന്ദ്രമായും പള്ളിയായും ഉപയോഗിക്കുന്നതിനായി സമർപ്പിച്ച വഖ്ഫ് സ്വത്താണ് കെട്ടിടമെന്നാണ് ഹർജിക്കാരുടെ വാദം. കെട്ടിടം പൊളിക്കുന്നത് സുപ്രീംകോടതി ഉത്തരവുകൾക്ക് വിരുദ്ധമാണെന്നും അവർ ചൂണ്ടിക്കാട്ടി.
തെക്കൻ മുംബൈയിലെ ഭെൻഡി ബസാറിൽ പാക്മോഡിയ സ്ട്രീറ്റിലുള്ള കെട്ടിടം പൊളിക്കുന്ന നടപടികൾ നവംബർ 19 വ്യാഴാഴ്ച രാവിലെയാണ് ബ്രിഹൻമുംബൈ മുനിസിപ്പൽ കോർപ്പറേഷൻ ആരംഭിച്ചത്. അപകടാവസ്ഥയിലുള്ളതും പൊളിച്ചുമാറ്റേണ്ടതുമായ കെട്ടിടങ്ങളെ ഉൾപ്പെടുത്തുന്ന സി-1 വിഭാഗത്തിലാണ് ഇതിനെ ഉൾപ്പെടുത്തിയിരുന്നത്.
1986ൽ ഇന്ത്യ വിടുന്നതിന് മുമ്പ് 1970കളിൽ ദാവൂദ് ഇബ്രാഹിമും കുടുംബവും താമസിച്ചിരുന്നത് ഈ കെട്ടിടത്തിലായിരുന്നു. ദാവൂദിന്റെ ആദ്യകാല പ്രവർത്തനകേന്ദ്രങ്ങളിലൊന്നായും ഈ കെട്ടിടം അറിയപ്പെടുന്നു.




