‘കേരളത്തിൻ്റെ പൊതുജീവിതത്തിൽ സവിശേഷമായ ഇടം നേടിയ വ്യക്തി’: ഡോ. എം.പി. പരമേശ്വരൻ്റെ വിയോഗത്തിൽ പിണറായി വിജയൻ

തിരുവനന്തപുരം: പ്രമുഖ കമ്മ്യൂണിസ്റ്റ് സൈദ്ധാന്തികൻ ഡോ. എം.പി. പരമേശ്വരന്റെ വിയോഗത്തിൽ പ്രതിപക്ഷ നേതാവ് പിണറായി വിജയൻ ആഴമായ ദുഃഖം രേഖപ്പെടുത്തുകയും അനുശോചനം അറിയിക്കുകയും ചെയ്തു. കേരളത്തിന്റെ ശാസ്ത്ര, സാംസ്‌കാരിക, സാമൂഹിക മേഖലകൾക്ക് വിലമതിക്കാനാകാത്ത സംഭാവനകൾ നൽകിയ അദ്ദേഹം പൊതുജീവിതത്തിൽ സവിശേഷമായ ഇടം നേടിയ വ്യക്തിത്വമായിരുന്നുവെന്ന് പ്രതിപക്ഷ നേതാവ് അനുസ്മരിച്ചു.(Opposition Leader Pinarayi Vijayan Condoles Death Of MP Parameswaran)

കേരളത്തിന്റെ ശാസ്ത്ര-സാംസ്‌കാരിക-സാമൂഹിക രംഗങ്ങൾക്ക് വിലമതിക്കാനാകാത്ത സംഭാവനകൾ നൽകിയ എം. പി. പരമേശ്വരന്റെ നിര്യാണത്തിൽ അനുശോചിക്കുന്നുവെന്ന് അദ്ദേഹം പറഞ്ഞു. ആണവ ശാസ്ത്രജ്ഞൻ, ശാസ്ത്രപ്രചാരകൻ, വൈജ്ഞാനിക സാഹിത്യകാരൻ, ചിന്തകൻ, സാമൂഹിക പ്രവർത്തകൻ എന്നീ നിലകളിൽ കേരളത്തിന്റെ പൊതുജീവിതത്തിൽ സവിശേഷമായ ഇടം നേടിയ വ്യക്തിയായിരുന്നു അദ്ദേഹം. ശാസ്ത്രത്തെ സാധാരണ ജനങ്ങളിലേക്ക് അടുപ്പിക്കുകയും ശാസ്ത്രീയബോധവും യുക്തിചിന്തയും സമൂഹത്തിൽ വളർത്തുകയും ചെയ്യുന്നതിന് ജീവിതം സമർപ്പിച്ച വ്യക്തിയായിരുന്നു എം. പി. പരമേശ്വരൻ. കേരള ശാസ്ത്രസാഹിത്യ പരിഷത്തിന്റെ വളർച്ചയിലും രാജ്യത്തെ ജനകീയ ശാസ്ത്ര-സാക്ഷരതാ പ്രസ്ഥാനങ്ങളിലും അദ്ദേഹം നിർണായക പങ്കുവഹിച്ചു.

ജീവിതത്തിന്റെ വിപുലമായ ഒരു ഘട്ടത്തിൽ ഇടതുപക്ഷ രാഷ്ട്രീയത്തിന്റെയും ശാസ്ത്രീയ സോഷ്യലിസ്റ്റ് ചിന്തകളുടെയും വക്താവും പ്രചാരകനുമായി അദ്ദേഹം ശ്രദ്ധേയനായിരുന്നു. ആണവ ശാസ്ത്രജ്ഞൻ എന്ന നിലയിൽ ലഭിക്കുമായിരുന്ന വലിയ സൗകര്യങ്ങളും സാധ്യതകളും ഉപേക്ഷിച്ചാണ് അദ്ദേഹം സാമൂഹിക പ്രവർത്തനത്തിന്റെ വഴിയിലേക്ക് ഇറങ്ങിയത്. അധികാരം താഴെത്തട്ടിലേക്ക് എത്തിക്കണമെന്ന ആശയത്തിന്റെയും അധികാര വികേന്ദ്രീകരണത്തിന്റെയും ശക്തനായ വക്താവായിരുന്നു അദ്ദേഹം. ജനപങ്കാളിത്തത്തോടെയുള്ള വികസനവും സമൂഹത്തിന്റെ താഴെത്തട്ടിലുള്ളവരുടെ ശാക്തീകരണവും ഉറപ്പാക്കണമെന്ന അദ്ദേഹത്തിന്റെ നിലപാടുകൾ കേരളത്തിന്റെ വികസന ചിന്തകളിലും ശ്രദ്ധേയമായ സ്വാധീനം ചെലുത്തി.

ശാസ്ത്രത്തെ സാധാരണ മനുഷ്യരുടെ ജീവിതവുമായി ബന്ധിപ്പിച്ചുകൊണ്ട് അദ്ദേഹം രചിച്ച നിരവധി കൃതികൾ തലമുറകളെ സ്വാധീനിച്ചു. അറിവും ശാസ്ത്രീയബോധവും ജനാധിപത്യവും സാമൂഹിക പുരോഗതിക്കുള്ള ഉപാധികളാക്കണമെന്ന അദ്ദേഹത്തിന്റെ നിലപാട് എന്നും ഓർമിക്കപ്പെടും. എം. പി. പരമേശ്വരന്റെ വിയോഗം കേരളത്തിന്റെ വൈജ്ഞാനിക, സാംസ്‌കാരിക, സാമൂഹിക മേഖലകൾക്ക് വലിയ നഷ്ടമാണ്. അദ്ദേഹത്തിന്റെ കുടുംബാംഗങ്ങളുടെയും സുഹൃത്തുക്കളുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നുവെന്ന് പിണറായി കുറിച്ചു.

Story Summary

Opposition Leader Pinarayi Vijayan expressed deep condolences over the demise of eminent Marxist ideologue and nuclear scientist Dr. M.P. Parameswaran. Highlighting his contributions, Pinarayi Vijayan recalled him as a unique personality who dedicated his life to popularizing science and decentralizing power, leaving an indelible mark on Kerala’s socio-cultural landscape.