ടിബറ്റ്-നേപ്പാൾ പ്രളയത്തിൽ മരിച്ചവർക്കായി പ്രാർത്ഥന; ദുരന്തബാധിതർക്ക് അനുശോചനം രേഖപ്പെടുത്തി ദലൈലാമ | Dalai Lama on Tibet Nepal floods

ലേ: ടിബറ്റിലും നേപ്പാളിലും ഓഗസ്റ്റ് 26-ന് ഉണ്ടായ വിനാശകരമായ മിന്നൽപ്രളയത്തിൽ മരിച്ചവർക്കും ദുരന്തത്തിൽ കാണാതായവർക്കുമായി പ്രത്യേക പ്രാർത്ഥന നടത്തി ടിബറ്റൻ ആത്മീയ നേതാവ് 14-ാമത് ദലൈലാമ. ലഡാക്കിലെ ലേയിൽ നടന്ന ദീർഘായുസ് പ്രാർത്ഥനാ ചടങ്ങിനിടെയാണ് ദുരന്തബാധിതർക്കായി അദ്ദേഹം പ്രാർത്ഥന നടത്തിയത് (Dalai Lama on Tibet Nepal floods). ഷെവാത്സെൽ ടീച്ചിങ് ഗ്രൗണ്ടിൽ നടന്ന ചടങ്ങിൽ പ്രളയത്തിൽ ജീവൻ നഷ്ടപ്പെട്ടവരെയും ഇപ്പോഴും കാണാതായവരെയും ദുരന്തത്തിന്റെ ആഘാതം നേരിടുന്ന കുടുംബങ്ങളെയും സമൂഹങ്ങളെയും അനുസ്മരിച്ചായിരുന്നു പ്രാർത്ഥന. ദലൈലാമയുടെ സാന്നിധ്യത്തിൽ പൊതുജനങ്ങൾ അവലോകിതേശ്വര മന്ത്രം അഥവാ ആറ് അക്ഷര മന്ത്രം ജപിക്കുകയും ദുരന്തബാധിതരുടെ ക്ഷേമത്തിനായി പ്രാർത്ഥിക്കുകയും ചെയ്തു.

ഓഗസ്റ്റ് 27-ന് തന്നെ ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങളോട് ദലൈലാമ അനുശോചനം അറിയിച്ചിരുന്നു. ദുരന്തത്തിൽ നിരവധി ജീവനുകൾ നഷ്ടപ്പെട്ടതിൽ ദുഃഖം രേഖപ്പെടുത്തിയ അദ്ദേഹം, ദുരിതബാധിതർക്കും കുടുംബങ്ങൾക്കും പിന്തുണയും സഹാനുഭൂതിയും അറിയിച്ചു. ദലൈലാമയുടെ പരിപാടിയെക്കുറിച്ച് സംസാരിച്ച ലഡാക്ക് ഗോംപ അസോസിയേഷൻ വൈസ് പ്രസിഡന്റ് ഗെഷെ താഷി, ബുദ്ധമത പഠനങ്ങളിൽ കരുണയ്ക്കും ദയയ്ക്കുമുള്ള പ്രാധാന്യം ചൂണ്ടിക്കാട്ടി. ദുരന്തസമയത്ത് എല്ലാവരും പരസ്പരം പിന്തുണച്ച് കരുണയുടെയും സഹാനുഭൂതിയുടെയും മൂല്യങ്ങൾ ഉയർത്തിപ്പിടിക്കണമെന്നും അദ്ദേഹം പറഞ്ഞു.

അതേസമയം, ദലൈലാമയുടെ ആരോഗ്യനിലയിൽ അടുത്തിടെ കാര്യമായ പുരോഗതിയുണ്ടായതായും ഗെഷെ താഷി അറിയിച്ചു. കഴിഞ്ഞ ദിവസങ്ങളിൽ വീൽചെയർ ഉപയോഗിച്ചിരുന്ന ദലൈലാമ പിന്നീട് സ്വയം നടന്നെത്തി മണിക്കൂറുകളോളം ജനങ്ങളെ അഭിസംബോധന ചെയ്തതായും അദ്ദേഹം പറഞ്ഞു. നേപ്പാളിലെ ഭോട്ടെകോശി നദിയുമായി ബന്ധപ്പെട്ട പ്രളയം വ്യാപകമായ നാശനഷ്ടമാണ് ഉണ്ടാക്കിയത്. നിരവധി പേർ മരിക്കുകയും കാണാതാവുകയും ചെയ്തതായി റിപ്പോർട്ടുകളുണ്ട്. ഗതാഗത സംവിധാനങ്ങൾക്കും ആശയവിനിമയ അടിസ്ഥാനസൗകര്യങ്ങൾക്കും ദുരന്തത്തിൽ ഗുരുതരമായ നാശനഷ്ടം സംഭവിച്ചിട്ടുണ്ട്.

Summary: Tibetan spiritual leader the 14th Dalai Lama offered special prayers for those killed and missing in the devastating floods that hit Tibet and Nepal on August 26. The prayers were held during a long-life ceremony in Leh, Ladakh, where members of the public also recited the Avalokiteshvara mantra for the victims and affected families.