ബീഡി നൽകാൻ വിസമ്മതിച്ചതിനെച്ചൊല്ലി തർക്കം; ചെന്നൈയിൽ അതിഥി തൊഴിലാളിയെ അടിച്ചുകൊന്നു, നാലുപേർ അറസ്റ്റിൽ | Chennai migrant worker murder

ചെന്നൈ: ബീഡി നൽകാൻ വിസമ്മതിച്ചതിനെ തുടർന്ന് മദ്യലഹരിയിലായിരുന്ന സംഘം അതിഥി തൊഴിലാളിയെ മർദിച്ച് കൊലപ്പെടുത്തിയതായി പരാതി. ചെന്നൈ നോലംബൂരിന് സമീപം നടന്ന സംഭവത്തിൽ പശ്ചിമബംഗാൾ സ്വദേശി അഭിജിത്ത് മൊണ്ടാൽ (62) ആണ് മരിച്ചത് (Chennai migrant worker murder). സംഭവത്തിൽ പ്ലസ് ടു വിദ്യാർഥികളടക്കം നാലുപേരെ പൊലീസ് അറസ്റ്റ് ചെയ്തു. സെപ്റ്റംബർ അഞ്ചിനാണ് സംഭവം നടന്നതെന്ന് പൊലീസ് അറിയിച്ചു. മൊണ്ടാൽ ഉൾപ്പെടെയുള്ള നിർമാണത്തൊഴിലാളികൾ താമസിച്ചിരുന്ന സ്ഥലത്തെത്തിയ പ്രതികൾ മദ്യലഹരിയിലായിരുന്നുവെന്നാണ് വിവരം. സിഗരറ്റും മദ്യവും ആവശ്യപ്പെട്ട് ഇവർ സ്ഥലത്ത് ബഹളമുണ്ടാക്കിയതായും തുടർന്ന് ബീഡി നൽകാൻ വിസമ്മതിച്ചതിനെച്ചൊല്ലി മൊണ്ടാലുമായി തർക്കമുണ്ടായതായുമാണ് പൊലീസ് പറയുന്നത്.

തർക്കം പിന്നീട് മർദനത്തിലേക്ക് നീങ്ങിയെന്നാണ് വിവരം. ഗുരുതരമായി പരിക്കേറ്റ മൊണ്ടാലിനെ ഉടൻ കിൽപോക്ക് സർക്കാർ ആശുപത്രിയിൽ പ്രവേശിപ്പിച്ചു. ചികിത്സ തുടരുന്നതിനിടെ ആരോഗ്യനില വഷളായതിനെ തുടർന്ന് പിറ്റേദിവസം അദ്ദേഹം മരണത്തിന് കീഴടങ്ങുകയായിരുന്നു. സംഭവത്തിൽ അന്വേഷണം നടത്തിയ നോലംബൂർ പൊലീസ് നാലുപേരെ അറസ്റ്റ് ചെയ്തു. അറസ്റ്റിലായവരിൽ പ്ലസ് ടു വിദ്യാർഥികളും ഉൾപ്പെടുന്നതായി പൊലീസ് അറിയിച്ചു. സംഭവത്തിന്റെ സാഹചര്യങ്ങളും പ്രതികളുടെ പങ്കും സംബന്ധിച്ച് കൂടുതൽ അന്വേഷണം പുരോഗമിക്കുകയാണ്.

Summary: A 62-year-old migrant construction worker from West Bengal died after allegedly being assaulted by a group near Nolambur, Chennai. Police arrested four people, including Plus Two students, in connection with the incident.