SIR ഹർജികൾ: തെരഞ്ഞെടുപ്പ് കമ്മീഷന് സുപ്രീം കോടതി നോട്ടീസ്; മറുപടി നൽകാൻ 10 ദിവസത്തെ സമയം അനുവദിച്ചു, ഹർജി നവംബർ 17ന് വീണ്ടും പരിഗണിക്കും | Supreme Court

ന്യൂഡൽഹി: എസ് ഐ ആർ നടപടികളിൽ വിവേചനപരമായും ഏകപക്ഷീയമായും തീരുമാനങ്ങൾ എടുത്തെന്ന ആരോപണത്തിൽ കേന്ദ്ര തെരഞ്ഞെടുപ്പ് കമ്മീഷന് സുപ്രീം കോടതി നോട്ടീസ് അയച്ചു. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ ഏകപക്ഷീയമായി തീരുമാനങ്ങളെടുത്തു എന്ന് ആരോപിച്ച് പ്രതിപക്ഷ നേതാക്കളും തൃണമൂൽ കോൺഗ്രസ് എം.പിയും സമർപ്പിച്ച ഹർജികളിലാണ് നടപടി.(Supreme Court Notice To Election Commission Unilateral Decisions Allegation SIR Row)

ചീഫ് ജസ്റ്റിസ് സൂര്യ കാന്ത്, ജസ്റ്റിസുമാരായ ജോയ്മാല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് കേസ് പരിഗണിച്ചത്. തെരഞ്ഞെടുപ്പ് കമ്മീഷൻ സമർപ്പിച്ച സത്യവാങ്മൂലത്തിന് മറുപടി നൽകാൻ ഹർജിക്കാർക്ക് സുപ്രീം കോടതി രണ്ടാഴ്ചത്തെ സമയം അനുവദിച്ചു. കേസ് നവംബർ 17-ന് വീണ്ടും പരിഗണിക്കും. തൃണമൂൽ കോൺഗ്രസിന് വേണ്ടി ഹാജരായ മുതിർന്ന അഭിഭാഷക ഡോ. മേനക ഗുരുസ്വാമി, പുതിയ വോട്ടർ രജിസ്ട്രേഷനായുള്ള ഓൺലൈൻ ഫോം 6-ൽ (Form 6) കമ്മീഷൻ തിരിമറി നടത്തിയതായി കോടതിയിൽ വാദിച്ചു.

സുപ്രീം കോടതി ഉത്തരവ് പ്രകാരമാണ് മാറ്റങ്ങൾ വരുത്തിയതെന്ന് കാണിച്ച് കമ്മീഷൻ വാർത്താക്കുറിപ്പ് ഇറക്കിയത് ധാർഷ്ട്യമാണെന്നും അവർ ചൂണ്ടിക്കാട്ടി. വിഷയത്തിൽ കൃത്യമായ പരിശോധന നടത്തുമെന്ന് ചീഫ് ജസ്റ്റിസ് വ്യക്തമാക്കി. അതേസമയം കമ്മീഷനുവേണ്ടി ഹാജരായ മുതിർന്ന അഭിഭാഷകൻ മനീന്ദർ സിങ് ഈ ആരോപണങ്ങളെ ശക്തമായി എതിർത്തു. എന്നാൽ തങ്ങൾക്കെതിരെയുള്ള ആരോപണങ്ങൾ തെരഞ്ഞെടുപ്പ് കമ്മീഷൻ തള്ളി.

2025 ജൂൺ, ഒക്ടോബർ, 2026 മേയ് മാസങ്ങളിൽ പുറപ്പെടുവിച്ച മൂന്ന് എസ്.ഐ.ആർ (SIR) ഉത്തരവുകളും കമ്മീഷനിലെ മൂന്ന് അംഗങ്ങളും ചേർന്നാണ് എടുത്തതെന്നും ഗ്യാനേഷ് കുമാർ ഏകപക്ഷീയമായി തീരുമാനമെടുത്തിട്ടില്ലെന്നും കമ്മീഷൻ സത്യവാങ്മൂലത്തിൽ വ്യക്തമാക്കി. ഈ ഉത്തരവുകൾ വഴി ഫോം 6-ൽ മാറ്റങ്ങളൊന്നും വരുത്തിയിട്ടില്ലെന്നും കമ്മീഷൻ സുപ്രീം കോടതിയെ അറിയിച്ചു. സാങ്കേതിക കുറിപ്പുകൾ ഒരു ഭരണഘടനാ സ്ഥാപനത്തിന്റെ സാധാരണ നടപടിക്രമം മാത്രമാണെന്നും അന്തിമ തീരുമാനങ്ങൾ കൂട്ടായ പരിശോധനയിലൂടെയാണ് എടുത്തതെന്നും കമ്മീഷൻ വ്യക്തമാക്കി.

എസ്.ഐ.ആർ നടപടികൾക്കെതിരെ പ്രതിപക്ഷം പ്രതിഷേധം കടുപ്പിക്കുകയാണ്. നവംബർ 1-ന് ഡൽഹി രാംലീല മൈതാനത്ത് നടത്തുന്ന ‘ഡൽഹി ചലോ’ പ്രക്ഷോഭത്തിന് മുന്നോടിയായി, ഒക്ടോബർ 30-ന് മുഖ്യ തെരഞ്ഞെടുപ്പ് കമ്മീഷണർക്കെതിരെ പ്രതീകാത്മക ഇംപീച്ച്‌മെന്റ് നടപടികൾ സംഘടിപ്പിക്കാൻ ഇന്ത്യാ സഖ്യം തീരുമാനിച്ചിട്ടുണ്ട്.

Story Summary

The Supreme Court issued a notice to the Election Commission of India over petitions alleging unilateral decision-making by CEC Gyanesh Kumar and tampering with voter registration Form 6 during the SIR exercise. A bench headed by CJI Surya Kant granted the petitioners two weeks to respond to the ECI’s affidavit and fixed the next hearing for November 17.