‘ശത്രു’ അല്ല ..! ബംഗാൾ ഉൾക്കടലിൽ കാണാതായ കപ്പലിനായുള്ള രക്ഷാപ്രവർത്തനങ്ങൾ; ഇന്ത്യയും ചൈനയും കൈകോർത്ത് അന്വേഷണം

ബംഗാൾ ഉൾക്കടലിൽ ചരക്കുകപ്പലിൽ നിന്ന് ആശയവിനിമയം നഷ്ടപ്പെട്ടതിനെ തുടർന്ന് 22 ജീവനക്കാർക്കായി ഇന്ത്യയും ചൈനയും ചേർന്ന് വ്യാപക തിരച്ചിൽ തുടരുന്നു. എംവി ഓഷ്യൻ വിന്നർ എന്ന കപ്പലാണ് കാണാതായത്. കപ്പലിലുണ്ടായിരുന്ന 24 ജീവനക്കാരിൽ രണ്ടുപേരെ ലൈഫ് റാഫ്റ്റുകളിൽ നിന്ന് രക്ഷപ്പെടുത്തിയെങ്കിലും ബാക്കിയുള്ള 22 പേരെ കണ്ടെത്താനുള്ള ശ്രമമാണ് ഇപ്പോൾ ഊർജിതമാക്കിയിരിക്കുന്നത്. കാണാതായവരിൽ 20 പേർ ചൈനീസ് പൗരന്മാരും മൂന്ന് പേർ മ്യാൻമർ സ്വദേശികളും ഒരാൾ ബംഗ്ലാദേശ് സ്വദേശിയുമാണ്.

ഓഗസ്റ്റ് 22ന് രാവിലെ 11.48ഓടെയാണ് ശ്രീ വിജയപുരത്തെ മാരിടൈം റെസ്ക്യൂ കോ-ഓർഡിനേഷൻ സെന്ററിന് കപ്പലുമായുള്ള ബന്ധം നഷ്ടപ്പെട്ടതായി അറിയിപ്പ് ലഭിച്ചത്. കപ്പലിന്റെ ഓപ്പറേറ്ററായ വിക്ടറി സ്റ്റാർ ഗ്രൂപ്പ് കമ്പനി ലിമിറ്റഡ് അടിയന്തര സഹായം അഭ്യർഥിച്ചു. ആൻഡമാൻ ദ്വീപുകളുടെ വടക്കൻ അറ്റത്ത് നിന്ന് ഏകദേശം 310 നോട്ടിക്കൽ മൈൽ വടക്കുപടിഞ്ഞാറായിരുന്നു കപ്പലിന്റെ അവസാനമായി ലഭിച്ച സ്ഥാനം. തുടർന്ന് ഇന്ത്യൻ സെർച്ച് ആൻഡ് റെസ്ക്യൂ ശൃംഖല സജീവമാക്കുകയും എംടി ഐസോപോസ് എന്ന ടാങ്കർ കപ്പലിനെ പ്രദേശത്തേക്ക് തിരിച്ചുവിടുകയും ചെയ്തു. അന്നുതന്നെ രാത്രി എട്ടുമണിയോടെ രണ്ട് ലൈഫ് റാഫ്റ്റുകളിൽ നിന്ന് രണ്ട് പേരെ ടാങ്കർ ജീവനക്കാർ രക്ഷപ്പെടുത്തി.

ALSO READ;‘പിരമിഡ്’ ഒക്കെ എന്ത്..! 1800 പേർ ചേർന്ന് 396 ടൺ കോട്ട നീക്കുന്നു; ഭ്രാന്തല്ല, ഇതാണ് സൂപ്പർ ജാപ്പനീസുകൾ

തുടർന്ന് ഇന്ത്യൻ കോസ്റ്റ് ഗാർഡിന്റെ ഐസിജിഎസ് വരദ്, ഐസിജിഎസ് അന്മോൽ, ഐസിജിഎസ് വിജിത് എന്നീ കപ്പലുകൾ തിരച്ചിലിനായി രംഗത്തെത്തി. ശ്രീ വിജയപുരത്തുനിന്ന് ഐസിജിഎസ് വിജിതും തിരച്ചിലിൽ ചേർന്നു. ബെയ്ജിങ് മാരിടൈം റെസ്ക്യൂ കോ-ഓർഡിനേഷൻ സെന്ററുമായി ഏകോപിപ്പിച്ചാണ് ഇപ്പോൾ തെരച്ചിൽ കൂടുതൽ ശക്തമാക്കിയിരിക്കുന്നത്. പ്രദേശത്തുള്ള മറ്റ് കോസ്റ്റ് ഗാർഡ് സംവിധാനങ്ങളെയും വ്യാപാര കപ്പലുകളെയും തിരച്ചിലിൽ ഏകോപിപ്പിച്ചിട്ടുണ്ട്. വ്യോമനിരീക്ഷണത്തിനിടെ ഒരു നാവിക വിമാനം ദുരിതസന്ദേശം കണ്ടെത്തുകയും ഐസിജിഎസ് വരദിനെ ആ ഭാഗത്തേക്ക് നയിക്കുകയും ചെയ്തു. തുടർന്ന് എംവി ഓഷ്യൻ വിന്നറുമായി ബന്ധപ്പെട്ട എമർജൻസി ബീക്കൺ കണ്ടെത്തി.

ഓഗസ്റ്റ് 25ന് രാവിലെ ഏഴുമണിയോടെ ഐസിജിഎസ് വരദ് തിരച്ചിൽ മേഖലയിലുണ്ടായിരുന്ന കപ്പലിന്റെ ഒരു ലൈഫ് ബോട്ട് കണ്ടെത്തി. കോസ്റ്റ് ഗാർഡ് സംഘം ബോട്ട് പരിശോധിച്ചെങ്കിലും അതിൽ ആരെയും കണ്ടെത്താനായില്ല. കാണാതായ 22 പേർക്കായുള്ള വ്യോമ-കടൽ തിരച്ചിൽ കോസ്റ്റ് ഗാർഡ് കപ്പലുകളും വിമാനങ്ങളും വ്യാപാര കപ്പലുകളും ഉപയോഗിച്ച് തുടരുകയാണ്. രക്ഷപ്പെടുത്തിയ രണ്ട് പേരുടെ ആരോഗ്യനിലയെക്കുറിച്ചോ കപ്പലുമായുള്ള ബന്ധം നഷ്ടപ്പെടാനുള്ള കാരണത്തെക്കുറിച്ചോ അധികൃതർ കൂടുതൽ വിവരങ്ങൾ പുറത്തുവിട്ടിട്ടില്ല. വടക്കൻ ബംഗാൾ ഉൾക്കടലിലെ വിശാലമായ മേഖലയിലാണ് ഇന്ത്യയുടെയും ചൈനയുടെയും നേതൃത്വത്തിൽ തിരച്ചിൽ തുടരുന്നത്.

The post ‘ശത്രു’ അല്ല ..! ബംഗാൾ ഉൾക്കടലിൽ കാണാതായ കപ്പലിനായുള്ള രക്ഷാപ്രവർത്തനങ്ങൾ; ഇന്ത്യയും ചൈനയും കൈകോർത്ത് അന്വേഷണം appeared first on Express Kerala.