ഓപ്പറേഷൻ സിന്ദൂരിൽ കരുത്തുകാട്ടിയ എസ്-400; ഇന്ത്യയ്ക്ക് അഞ്ച് യൂണിറ്റുകൾ കൂടി വിൽക്കാൻ റഷ്യയുടെ നീക്കം | S-400 India Russia deal

ന്യൂഡൽഹി: ഓപ്പറേഷൻ സിന്ദൂരിൽ ഇന്ത്യയുടെ വ്യോമപ്രതിരോധത്തിന് നിർണായക കരുത്തായി മാറിയ എസ്-400 ട്രയംഫ് മിസൈൽ സംവിധാനത്തിന്റെ അഞ്ച് യൂണിറ്റുകൾ കൂടി ഇന്ത്യയ്ക്ക് വിൽക്കാൻ റഷ്യ (S-400 India Russia deal). ഇന്ത്യൻ വ്യോമസേനയ്ക്കായി പുതിയ മിസൈൽ സംവിധാനങ്ങൾ വാങ്ങുന്നതിനുള്ള ടെൻഡറിന് മറുപടിയായാണ് റഷ്യ അഞ്ച് എസ്-400 യൂണിറ്റുകൾ കൂടി വാഗ്ദാനം ചെയ്തതെന്നാണ് റിപ്പോർട്ട്.

ഇന്ത്യൻ സേനയിൽ ‘സുദർശൻ’ എന്ന പേരിലാണ് എസ്-400 അറിയപ്പെടുന്നത്. ഓപ്പറേഷൻ സിന്ദൂരിനിടെ പാകിസ്ഥാനിൽ നിന്ന് എത്തിയ വിവിധ വ്യോമഭീഷണികളെ നേരിടുന്നതിൽ എസ്-400 നിർണായക പങ്കുവഹിച്ചെന്നാണ് വിലയിരുത്തൽ. ഏകദേശം 400 കിലോമീറ്റർ വരെ പ്രഹരപരിധിയുള്ള മിസൈലുകൾ ഉൾപ്പെടുന്ന സംവിധാനമായതിനാൽ ശത്രുവിമാനങ്ങൾക്ക് സ്വന്തം വ്യോമപരിധിക്കുള്ളിൽ പോലും സുരക്ഷിതമായി പ്രവർത്തിക്കുന്നത് ബുദ്ധിമുട്ടാക്കാൻ എസ്-400ന് കഴിയും.

ഷാങ്ഹായ് സഹകരണ സംഘടന (SCO) ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും റഷ്യൻ പ്രസിഡന്റ് വ്‌ളാദിമിർ പുടിനും തമ്മിൽ നടന്ന കൂടിക്കാഴ്ചയ്ക്കിടെയാണ് പുതിയ പ്രതിരോധ ഇടപാടുമായി ബന്ധപ്പെട്ട നീക്കം ഉണ്ടായത്. പ്രതിരോധം, ഊർജം തുടങ്ങിയ മേഖലകളിലെ ഉഭയകക്ഷി സഹകരണത്തിന്റെ പുരോഗതിയും ഇരു നേതാക്കളും വിലയിരുത്തിയിരുന്നു. 2018ൽ ഒപ്പുവെച്ച ആദ്യ കരാർ പ്രകാരം ഇന്ത്യയ്ക്ക് ലഭിക്കേണ്ട അഞ്ച് എസ്-400 യൂണിറ്റുകളിൽ നാലെണ്ണം ഇതിനകം രാജ്യത്തെത്തിയിട്ടുണ്ട്. അഞ്ചാമത്തെയും അവസാനത്തെയും യൂണിറ്റ് നവംബറോടെ ഇന്ത്യയ്ക്ക് കൈമാറുമെന്നാണ് പ്രതീക്ഷിക്കുന്നത്. ഇതിന് പിന്നാലെയായിരിക്കും പുതിയ അഞ്ച് യൂണിറ്റുകൾക്കായുള്ള കരാറിലെ വിതരണ നടപടികൾ ആരംഭിക്കുക.

പുതിയ കരാർ ഒപ്പുവെച്ചാൽ ഏകദേശം മൂന്ന് വർഷത്തിനുള്ളിൽ അധിക എസ്-400 സംവിധാനങ്ങളുടെ വിതരണം ആരംഭിക്കാനാണ് സാധ്യത. ഓപ്പറേഷൻ സിന്ദൂരിലെ പ്രകടനം വിലയിരുത്തിയ ശേഷമാണ് അഞ്ച് എസ്-400 സ്ക്വാഡ്രണുകൾ കൂടി സ്വന്തമാക്കാൻ ഇന്ത്യ തീരുമാനിച്ചതെന്നാണ് റിപ്പോർട്ട്. കിഴക്കൻ, പടിഞ്ഞാറൻ അതിർത്തികളിൽ അധിക യൂണിറ്റുകൾ വിന്യസിച്ച് രാജ്യത്തിന്റെ ബഹുതല വ്യോമപ്രതിരോധ സംവിധാനം കൂടുതൽ ശക്തിപ്പെടുത്തുകയാണ് ലക്ഷ്യം.

ഇന്ത്യ-റഷ്യ പ്രതിരോധ സഹകരണത്തിന്റെ ഭാഗമായി എസ്-400ന് പുറമെ എസ്-500 പ്രോമിത്യൂസിന്റെ സഹനിർമാണം, സുഖോയ്-57E യുദ്ധവിമാനം, കലിബർ ക്രൂസ് മിസൈൽ ശേഷിയുള്ള കിലോ ക്ലാസ് അന്തർവാഹിനി, വൊറോനെഷ് തന്ത്രപ്രധാന മുന്നറിയിപ്പ് റഡാർ, ‘സൂപ്പർ സുഖോയ്’ എസ്‌യു-30 നവീകരണ പദ്ധതി തുടങ്ങിയവയും ചർച്ചയിലുള്ളതായി റിപ്പോർട്ടുകളുണ്ട്.

Summary: Russia has offered India five additional S-400 Triumf air defence systems following their reported performance during Operation Sindoor. India has already received four of the five systems ordered under its 2018 contract, with the final unit expected by November.