മെട്രോ മോഹങ്ങൾക്ക് ചെറിയൊരു ബ്രേക്ക്? കൊച്ചി മെട്രോ മൂന്നാംഘട്ടത്തിന്റെ വിവരങ്ങൾ പുറത്ത്!

ഏവരും ആകാംക്ഷയോടെ കാത്തിരിക്കുന്ന കൊച്ചി മെട്രോയുടെ മൂന്നാംഘട്ട പദ്ധതിയുമായി ബന്ധപ്പെട്ട കൂടുതൽ നിർണായക വിവരങ്ങൾ പുറത്തുവന്നു. 17.5 കിലോമീറ്റർ നീളമുള്ള ഈ പുതിയ ഘട്ടത്തിൽ ആകെ 15 സ്റ്റേഷനുകളാണ് വിഭാവനം ചെയ്തിരിക്കുന്നത്. എന്നാൽ ഏറെ പ്രതീക്ഷയർപ്പിച്ചിരുന്ന അങ്കമാലി റെയിൽവേ സ്റ്റേഷനെ മൂന്നാംഘട്ട പദ്ധതിയിൽ ഉൾപ്പെടുത്തിയിട്ടില്ല. പദ്ധതിച്ചെലവ് ഗണ്യമായി കുറയ്ക്കുക എന്ന ലക്ഷ്യത്തോടെയാണ് ഈ സുപ്രധാന മാറ്റം വരുത്തിയിരിക്കുന്നതെന്ന് കൊച്ചി മെട്രോ റെയിൽ ലിമിറ്റഡ് (കെഎംആർഎൽ) വ്യക്തമാക്കിയിട്ടുണ്ട്. ഇതിന്റെ വിശദമായ പദ്ധതി രേഖ (ഡിപിആർ) ഇതിനോടകം തന്നെ സംസ്ഥാന സർക്കാരിന് സമർപ്പിച്ചിട്ടുണ്ട്.

ആലുവയിൽനിന്ന് ആരംഭിക്കുന്ന മൂന്നാംഘട്ട പാത കരിയാടുനിന്ന് തിരിഞ്ഞ് നെടുമ്പാശ്ശേരി വിമാനത്താവളത്തിലേക്ക് കടക്കുന്ന രീതിയിലാണ് രൂപകൽപ്പന ചെയ്തിരിക്കുന്നത്. തുടർന്ന് നായത്തോട്, കവരപ്പറമ്പ്, അരീക്കൽ ജംഗ്ഷൻ എന്നിവ കടന്ന് കരയാപറമ്പിൽ എത്തിയാണ് ഇത് അവസാനിക്കുന്നത്. ആലുവ മുതൽ കരിയാട് വരെയുള്ള ഭാഗം ദേശീയപാത 544-ലൂടെ ഉയരപ്പാതയായിട്ടായിരിക്കും നിർമിക്കുക. പദ്ധതിയുടെ ഭാഗമായി മൂന്ന് കിലോമീറ്റർ ദൂരം ഭൂമിക്കടിയിലൂടെയാണ് (അണ്ടർഗ്രൗണ്ട് പാത) നിർമിക്കുന്നത്. നെടുമ്പാശ്ശേരി വിമാനത്താവള പ്രദേശം ഉൾപ്പെടെ രണ്ട് സ്റ്റേഷനുകൾ ഈ ഭൂഗർഭപാതയിലായിരിക്കും സജ്ജീകരിക്കുക.

Also Read: ട്രെയിനിൽ മദ്യപിച്ച് കയറിയാൽ പണികിട്ടും! ശിക്ഷാ നടപടികൾ ശരിവെച്ച് ഹൈക്കോടതി

തോട്ടക്കാട്ടുകര, കുന്നംപുറം, പറമ്പയം, നെടുമ്പാശ്ശേരി, അത്താണി, കരിയാട്, എയർപോർട്ട് റെയിൽവേ സ്റ്റേഷൻ, സിയാൽ എയർപോർട്ട്, നായത്തോട്, കവരപ്പറമ്പ്, അരീക്കൽ ജംഗ്ഷൻ, ലിറ്റിൽ ഫ്ലവർ ആശുപത്രി, അങ്കമാലി ടൗൺ, കോതകുളങ്ങര, കരയാപറമ്പ് എന്നിങ്ങനെയാണ് നിർദ്ദിഷ്ട സ്റ്റേഷനുകൾ. വിമാനത്താവള പരിസരത്ത് സ്റ്റേഷൻ നിർമിക്കുന്നതുമായി ബന്ധപ്പെട്ട് സിയാലും കെഎംആർഎല്ലും തമ്മിൽ ചർച്ചകൾ നടത്തിക്കഴിഞ്ഞു. ഡൊമസ്റ്റിക്, ഇന്റർനാഷണൽ ടെർമിനലുകൾക്കിടയിലുള്ള താജ് ഹോട്ടലിന് മുന്നിലെ സ്ഥലം സ്റ്റേഷനായി തിരഞ്ഞെടുക്കാനാണ് സാധ്യതയെന്നും അധികൃതർ വ്യക്തമാക്കുന്നു.

The post മെട്രോ മോഹങ്ങൾക്ക് ചെറിയൊരു ബ്രേക്ക്? കൊച്ചി മെട്രോ മൂന്നാംഘട്ടത്തിന്റെ വിവരങ്ങൾ പുറത്ത്! appeared first on Express Kerala.