ചാറ്റുകളിൽ ഇനി മൂന്നാം കക്ഷി AI ഏജന്റുമാരെയും ഉപയോഗിക്കാം; പുതിയ ഫീച്ചറുമായി വാട്ട്‌സ്ആപ്പ് എത്തുന്നു?

ഉപയോക്താക്കൾക്ക് തങ്ങളുടെ വാട്ട്‌സ്ആപ്പ് ചാറ്റുകളിലേക്ക് മൂന്നാം കക്ഷി AI ഏജന്റുമാരെ നേരിട്ട് ബന്ധിപ്പിക്കാൻ സാധിക്കുന്ന പുതിയ ഫീച്ചർ വരുന്നു. ഇതിലൂടെ മറ്റ് ആപ്പുകളിലേക്ക് പോകാതെ തന്നെ വാട്ട്‌സ്ആപ്പിൽ വെച്ച് തന്നെ വിവിധ AI സേവനങ്ങളുമായി സംവദിക്കാൻ ഉപയോക്താക്കൾക്ക് സാധിക്കും. നിലവിൽ ആൻഡ്രോയിഡ് ബീറ്റ പതിപ്പിൽ (2.26.35.3) ഈ ഫീച്ചറിന്റെ പരീക്ഷണങ്ങൾ നടന്നു വരികയാണെന്ന് WABetaInfo റിപ്പോർട്ട് ചെയ്യുന്നു.

വാട്ട്‌സ്ആപ്പ് ക്രമീകരണങ്ങളിൽ പുതിയതായി ഉൾപ്പെടുത്തുന്ന ‘ഏജന്റ്സ്’ വിഭാഗം വഴി ഉപയോക്താക്കൾക്ക് അനുയോജ്യമായ മൂന്നാം കക്ഷി AI സേവനങ്ങൾ ചേർക്കാൻ സാധിക്കും. ഒരു അക്കൗണ്ടിൽ പരമാവധി അഞ്ച് AI ഏജന്റുകളെ വരെ ഇങ്ങനെ കോൺഫിഗർ ചെയ്യാൻ കഴിയും. ഓരോ ഏജന്റിനും പ്രത്യേക പേരും പ്രൊഫൈൽ ചിത്രവും നൽകാം. തുടർന്ന് API കീ വഴി ഈ സേവനങ്ങളെ വാട്ട്‌സ്ആപ്പുമായി ബന്ധിപ്പിക്കാൻ സാധിക്കും. കണക്റ്റ് ചെയ്തുകഴിഞ്ഞാൽ മറ്റ് കോൺടാക്റ്റുകൾക്ക് മെസ്സേജ് അയക്കുന്നത് പോലെ ഈ AI സേവനങ്ങളുമായും പ്രത്യേകം ചാറ്റ് ചെയ്യാം എന്നതാണ് ഇതിന്റെ പ്രധാന പ്രത്യേകത.

Also Read: ഐ.എസ്.ആർ.ഒ ഇനി റോക്കറ്റുകൾ നിർമ്മിക്കില്ലേ? ബഹിരാകാശ ഏജൻസിയിൽ കൊടുങ്കാറ്റഴിച്ചുവിട്ട് പവൻ ഗോയങ്കയുടെ പ്രസ്താവന!

ഉപയോക്താക്കളുടെ സ്വകാര്യത മുൻനിർത്തി കർശനമായ സുരക്ഷാ മുൻകരുതലുകളും ഈ ഫീച്ചറിൽ ഏർപ്പെടുത്തിയിട്ടുണ്ട്. മൂന്നാം കക്ഷി AI ഏജന്റുകൾക്ക് ഉപയോക്താവിന്റെ മറ്റ് വ്യക്തിഗത ചാറ്റുകളിലേക്കോ, കോൺടാക്റ്റുകളിലേക്കോ, മീഡിയ ഫയലുകളിലേക്കോ പ്രവേശനം ഉണ്ടായിരിക്കില്ല. കൂടാതെ ഇവയെ ഗ്രൂപ്പ് ചാറ്റുകളിലേക്കോ കമ്മ്യൂണിറ്റികളിലേക്കോ ചേർക്കാനും കഴിയില്ല. ഉപയോക്താക്കൾക്ക് എപ്പോൾ വേണമെങ്കിലും ഇത്തരം ഏജന്റുകളെ നീക്കം ചെയ്യാനോ പുതിയവ ഉൾപ്പെടുത്താനോ ഉള്ള പൂർണ്ണ സ്വാതന്ത്ര്യവും ഇതിലുണ്ട്.

The post ചാറ്റുകളിൽ ഇനി മൂന്നാം കക്ഷി AI ഏജന്റുമാരെയും ഉപയോഗിക്കാം; പുതിയ ഫീച്ചറുമായി വാട്ട്‌സ്ആപ്പ് എത്തുന്നു? appeared first on Express Kerala.