ഓപ്പറേഷൻ തൂഫാൻ: അറസ്റ്റുകൾ 10,971 ആയി; 10,153 കേസുകൾ, 23.45 കിലോ എംഡിഎംഎ പിടിച്ചെടുത്തു | Operation Toofan Kerala
തിരുവനന്തപുരം: ലഹരിക്കെതിരായ കേരള പോലീസിന്റെ ഓപ്പറേഷൻ തൂഫാന്റെ ഭാഗമായി സംസ്ഥാനത്ത് ഇതുവരെ 10,971 പേരെ അറസ്റ്റ് ചെയ്തു. കഴിഞ്ഞ ദിവസം 83 കേസുകളിലായി 88 പേർ കൂടി അറസ്റ്റിലായതോടെ ഓപ്പറേഷന്റെ ഭാഗമായി രജിസ്റ്റർ ചെയ്ത കേസുകളുടെ എണ്ണം 10,153 ആയി (Operation Toofan Kerala). ഓപ്പറേഷന്റെ ഭാഗമായി ഇതുവരെ 23,456.633 ഗ്രാം എംഡിഎംഎ, 1,217.810 കിലോഗ്രാം കഞ്ചാവ്, 699.104 ഗ്രാം ബ്രൗൺഷുഗർ, 528.647 ഗ്രാം ഹെറോയിൻ, 68 ഗ്രാം നൈട്രാസെപാം എന്നിവ പിടിച്ചെടുത്തതായി പോലീസ് അറിയിച്ചു.
കഴിഞ്ഞ ദിവസം രജിസ്റ്റർ ചെയ്ത കേസുകളിൽ സ്മോൾ ക്വാണ്ടിറ്റി ലഹരിമരുന്ന് കൈവശം വച്ചതിന് 44 കേസുകളും മീഡിയം ക്വാണ്ടിറ്റിക്ക് മൂന്ന് കേസുകളും കൊമേഴ്സ്യൽ ക്വാണ്ടിറ്റിക്ക് ഒരു കേസും ഉൾപ്പെടുന്നു. എൻഡിപിഎസ് നിയമപ്രകാരം 35 കേസുകളും കോട്പ നിയമപ്രകാരം 55 കേസുകളും രജിസ്റ്റർ ചെയ്തു. ഈ കേസുകളിൽ 17.887 ഗ്രാം എംഡിഎംഎ, 3.456 കിലോഗ്രാം കഞ്ചാവ്, 0.01 ഗ്രാം ബ്രൗൺഷുഗർ, 0.2 ഗ്രാം ഹെറോയിൻ, 12 ഗ്രാം നൈട്രാസെപാം എന്നിവ പിടിച്ചെടുത്തു.
ലഹരിക്കെതിരായ ബോധവത്കരണത്തിനും പോലീസ് ഊന്നൽ നൽകുന്നുണ്ട്. കഴിഞ്ഞ ദിവസം മാത്രം സംസ്ഥാനത്തുടനീളം 22 ബോധവത്കരണ ക്ലാസുകൾ നടത്തി. ഇതോടെ ഓപ്പറേഷൻ തൂഫാന്റെ ഭാഗമായി ഇതുവരെ നടത്തിയ ബോധവത്കരണ ക്ലാസുകളുടെ എണ്ണം 9,551 ആയി. കൂടാതെ 649 കൗൺസിലിങ്ങുകളും സ്കൂൾ, കോളേജ് പ്രൊട്ടക്ഷൻ ഗ്രൂപ്പുകളുടെ നേതൃത്വത്തിൽ 6,714 ബോധവത്കരണ പരിപാടികളും നടത്തിയിട്ടുണ്ട്.
ലഹരിമരുന്ന് വിൽപ്പനയുമായി ബന്ധപ്പെട്ട വിവരങ്ങൾ പൊതുജനങ്ങൾക്ക് പോലീസിനെ അറിയിക്കാമെന്ന് അധികൃതർ അറിയിച്ചു. ഫോൺ, വാട്സ്ആപ്പ് സംവിധാനങ്ങളിലൂടെ ലഭിക്കുന്ന വിവരങ്ങൾ രഹസ്യമായി സൂക്ഷിക്കുമെന്നും പോലീസ് വ്യക്തമാക്കി.
Summary: Kerala Police has arrested 10,971 people and registered 10,153 cases as part of Operation Toofan against drug abuse. Large quantities of MDMA, cannabis, heroin and other narcotic substances have been seized, alongside thousands of awareness programmes and counselling sessions.
