നവജാത ശിശുക്കൾക്കൊപ്പമുള്ള ചിത്രങ്ങൾ സോഷ്യൽ മീഡിയയിൽ പങ്കുവെച്ചു; സ്വകാര്യതാ വിവാദത്തിന് പിന്നാലെ മാപ്പ് പറഞ്ഞ് മെഡിക്കൽ ഇന്റേൺ | Newborn Baby Photos Controversy
കൊൽക്കത്ത: ആശുപത്രിയിൽ ചികിത്സയിലുള്ള നവജാത ശിശുക്കൾക്കൊപ്പമുള്ള ചിത്രങ്ങളും വീഡിയോകളും സോഷ്യൽ മീഡിയയിൽ പങ്കുവെച്ചതിനെ തുടർന്ന് കൊൽക്കത്തയിലെ മെഡിക്കൽ ഇന്റേൺ മാപ്പുപറഞ്ഞു (Newborn Baby Photos Controversy). കൽക്കട്ട നാഷണൽ മെഡിക്കൽ കോളജ് ആൻഡ് ഹോസ്പിറ്റലിലെ ഇന്റേൺ സുധേഷ്ണ മണ്ഡലാണ് വിവാദമായ പോസ്റ്റുകൾ പിന്നീട് നീക്കം ചെയ്തത്. നിയോനേറ്റൽ, ലേബർ റൂം വിഭാഗങ്ങളുമായി ബന്ധപ്പെട്ട ചിത്രങ്ങളും വീഡിയോകളുമാണ് സുധേഷ്ണ സോഷ്യൽ മീഡിയയിൽ പങ്കുവെച്ചത്. ചില പോസ്റ്റുകളിൽ നവജാത ശിശുക്കളെ കൈയിലെടുത്തുനിൽക്കുന്ന ദൃശ്യങ്ങളും ഉൾപ്പെട്ടിരുന്നു. കുടുംബാംഗങ്ങളുടെയും പോസ്റ്റ് ഗ്രാജുവേറ്റ് ഡോക്ടർമാരുടെയും അനുമതി ലഭിച്ചിരുന്നുവെന്നും ഓർമയ്ക്കായാണ് ചിത്രങ്ങൾ എടുത്തതെന്നുമായിരുന്നു ഇന്റേണിന്റെ ആദ്യ വിശദീകരണം.
Dear “soon to be doctor”, I urge you to heed the message in the right way and delete your post.
You can really get into real trouble for this. A letter to the National Medical Commission (NMC) with your details and this post is good enough.
According to the NMC even with… https://t.co/v55jn5N5Ay
— TheLiverDoc
(@theliverdoc) September 5, 2026
എന്നാൽ രോഗികളുടെ സ്വകാര്യതയും മെഡിക്കൽ രംഗത്തെ പ്രൊഫഷണൽ മാനദണ്ഡങ്ങളും സംബന്ധിച്ച് സോഷ്യൽ മീഡിയയിൽ വിമർശനം ശക്തമായി. ആരോഗ്യവിദഗ്ധനായ ഡോ. സിറിയക് ആബി ഫിലിപ്സ്, ‘ദി ലിവർ ഡോക്’ എന്ന പേരിൽ അറിയപ്പെടുന്ന ഡോക്ടർ, പോസ്റ്റുകൾ നീക്കം ചെയ്യണമെന്ന് ആവശ്യപ്പെടുകയും ഇത്തരം ചിത്രങ്ങൾ പൊതുവേദിയിൽ പങ്കുവെക്കുന്നത് നിയമപരമായും പ്രൊഫഷണൽ തലത്തിലും പ്രശ്നങ്ങൾക്ക് ഇടയാക്കാമെന്ന് മുന്നറിയിപ്പ് നൽകുകയും ചെയ്തു. വിമർശനം ശക്തമായതോടെ സുധേഷ്ണ നവജാത ശിശുക്കളുമായി ബന്ധപ്പെട്ട എല്ലാ ചിത്രങ്ങളും സോഷ്യൽ മീഡിയയിൽ നിന്ന് നീക്കം ചെയ്തു. തുടർന്ന് പരസ്യമായി മാപ്പ് പറയുകയും ഭാവിയിൽ അനുമതിയുണ്ടെങ്കിലും ഇല്ലെങ്കിലും നവജാത ശിശുക്കളുടെ ചിത്രങ്ങൾ സോഷ്യൽ മീഡിയയിൽ പങ്കുവെക്കില്ലെന്ന് വ്യക്തമാക്കുകയും ചെയ്തു. ലേബർ റൂമിൽ പ്രവേശിക്കുന്നതിന് മുമ്പ് കൈകളും വാച്ചും നൂലും ഉൾപ്പെടെയുള്ളവ സാനിറ്റൈസ് ചെയ്തിരുന്നുവെന്നും ഇന്റേൺ വിശദീകരിച്ചു. അതേസമയം, കോളജ് അധികൃതരുടെ സമ്മർദത്തെ തുടർന്നാണ് മാപ്പ് പറഞ്ഞതെന്ന തരത്തിലുള്ള പ്രചാരണം അവർ നിഷേധിച്ചു.
സംഭവം ആരോഗ്യപ്രവർത്തകർ രോഗികളുമായി ബന്ധപ്പെട്ട ചിത്രങ്ങളും വിവരങ്ങളും സോഷ്യൽ മീഡിയയിൽ പങ്കുവെക്കുമ്പോൾ പാലിക്കേണ്ട സ്വകാര്യതാ മാനദണ്ഡങ്ങളെക്കുറിച്ചുള്ള ചർച്ചകൾക്കും വഴിവെച്ചിരിക്കുകയാണ്. പ്രത്യേകിച്ച് നവജാത ശിശുക്കളെപ്പോലുള്ള സംരക്ഷണം ആവശ്യമായ രോഗികളുടെ ചിത്രങ്ങൾ പങ്കുവെക്കുന്നതിൽ കൂടുതൽ ജാഗ്രത വേണമെന്ന അഭിപ്രായവും ഉയരുന്നുണ്ട്.
Summary: A medical intern at Calcutta National Medical College and Hospital apologised after sharing photos and videos featuring newborn babies on social media. She removed the posts following criticism over patient privacy and said she would not share images of newborns on social media in the future.
