മുതിർന്ന ബി.ജെ.പി നേതാവും മുൻ പഞ്ചാബ് മന്ത്രിയുമായിരുന്ന ഭഗത് ചുന്നി ലാൽ അന്തരിച്ചു: തദ്ദേശ സ്വയംഭരണ, മെഡിക്കൽ വിദ്യാഭ്യാസ വകുപ്പ് മന്ത്രിയായും ഡെപ്യൂട്ടി സ്പീക്കറായും മികച്ച സേവനം അനുഷ്ഠിച്ച പ്രമുഖ വ്യക്തിത്വം

ചണ്ഡീഗഡ്: മുതിര്‍ന്ന ബി.ജെ.പി നേതാവും മുന്‍ പഞ്ചാബ് മന്ത്രിയുമായിരുന്ന ഭഗത് ചുന്നി ലാല്‍ (93) അന്തരിച്ചു. വ്യാഴാഴ്ച ജലന്ധറിലെ വസതിയിലായിരുന്നു അന്ത്യമെന്ന് അദ്ദേഹത്തിന്റെ മകനും നിലവിലെ പഞ്ചാബ് ഹോര്‍ട്ടികള്‍ച്ചര്‍ മന്ത്രിയുമായ മൊഹീന്ദര്‍ ഭഗത് അറിയിച്ചു. 

അദ്ദേഹത്തോടുള്ള ആദരസൂചകമായി പഞ്ചാബ് സര്‍ക്കാര്‍ വ്യാഴാഴ്ച ഉച്ചയ്ക്ക് ശേഷം പകുതി ദിവസം ഔദ്യോഗിക അവധി പ്രഖ്യാപിച്ചു. 2012-ലെ പ്രകാശ് സിംഗ് ബാദല്‍ നയിച്ച എസ.്എ.ഡി-ബി.ജെ.പി സഖ്യ സര്‍ക്കാരില്‍ തദ്ദേശ സ്വയംഭരണം, മെഡിക്കല്‍ വിദ്യാഭ്യാസം എന്നീ വകുപ്പുകളുടെ ചുമതലയുള്ള കാബിനറ്റ് മന്ത്രിയായി അദ്ദേഹം സേവനമനുഷ്ഠിച്ചിട്ടുണ്ട്.

1932 ഡിസംബര്‍ 1-ന് സിയാല്‍കോട്ടില്‍ ജനിച്ച അദ്ദേഹത്തിന്റെ കുടുംബം വിഭജനത്തിന് ശേഷമാണ് ജലന്ധറിലേക്ക് കുടിയേറിയത്. 

1997, 2007, 2012 വര്‍ഷങ്ങളില്‍ നിയമസഭാംഗമായി തിരഞ്ഞെടുക്കപ്പെട്ട ഭഗത് ചുന്നി ലാല്‍, 2011-ല്‍ പഞ്ചാബ് നിയമസഭയുടെ ഡെപ്യൂട്ടി സ്പീക്കറായും പ്രവര്‍ത്തിച്ചിട്ടുണ്ട്. ഭൗതികശരീരം വ്യാഴാഴ്ച വൈകുന്നേരം 5 മണിക്ക് ജലന്ധറില്‍ സംസ്‌കരിക്കും.