ജന്തർ മന്തറിന് പകരം പ്രതിഷേധങ്ങൾക്ക് മറ്റ് സ്ഥിരം വേദി കണ്ടെത്തുമെന്ന് സുപ്രീംകോടതിയെ അറിയിച്ച് കേന്ദ്ര സർക്കാർ. മെട്രോ നിയന്ത്രണങ്ങൾ പുനഃപരിശോധിക്കാൻ കോടതി നിർദ്ദേശം. അടച്ചിടുന്ന സ്റ്റേഷനുകളുടെ എണ്ണം 45 ആയി കുറച്ചു. ജന്തർ മന്തറിൽ അടിസ്ഥാന സൗകര്യങ്ങളും അടിയന്തര ചികിത്സാ സൗകര്യങ്ങളും അസാധ്യമെന്ന് കേന്ദ്രം. 4 കി.മീ പരിധിയിൽ മൊബൈൽ ഇന്റർനെറ്റ് റദ്ദാക്കും
Current: മലയാളം
ന്യൂഡൽഹി: രാജ്യതലസ്ഥാനത്ത് സമാധാനപരമായ ബഹുജന പ്രതിഷേധങ്ങൾ സംഘടിപ്പിക്കുന്നതിനായി നിലവിലെ ജന്തർ മന്തറിന് പകരം ആവശ്യമായ സൗകര്യങ്ങളുള്ള മറ്റൊരു ബദൽ വേദി കണ്ടെത്തുന്ന കാര്യം ഗൗരവമായി പരിഗണിച്ചുവരികയാണെന്ന് കേന്ദ്ര സർക്കാർ സുപ്രീം കോടതിയെ അറിയിച്ചു.
കോക്രോച്ച് ജനതാ പാർട്ടി (സി.ജെ.പി), പ്രതിപക്ഷ പാർട്ടികൾ എന്നിവരുടെ പ്രക്ഷോഭങ്ങളെ പ്രതിരോധിക്കാൻ ഡൽഹിയിൽ വ്യാപകമായി മെട്രോ സ്റ്റേഷനുകൾ അടച്ചുപൂട്ടിയതിനെതിരെ സമർപ്പിച്ച ഹർജികൾ പരിഗണിക്കവെ സോളിസിറ്റർ ജനറൽ തുഷാർ മേത്തയാണ് പരമോന്നത നീതിപീഠത്തെ ഇക്കാര്യം വ്യക്തമാക്കിയത്.
സമരക്കാർക്ക് ആവശ്യമായ അടിസ്ഥാന സൗകര്യങ്ങളോടെ അനുയോജ്യമായ മറ്റൊരു സ്ഥലം സർക്കാർ ഉടൻ കണ്ടെത്തണമെന്ന് ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് നിർദ്ദേശിച്ചു.
പ്രതിഷേധം സംഘടിപ്പിക്കാൻ സി.ജെ.പിക്കും യൂത്ത് കോൺഗ്രസിനും ജന്തർ മന്തറിൽ അനുമതി നിഷേധിച്ചതായും പകരം രാംലീല മൈതാനം അനുവദിക്കാൻ ഭരണകൂടം തയ്യാറായില്ലെന്നും മുതിർന്ന അഭിഭാഷകൻ കപിൽ സിബൽ കോടതിയിൽ ചൂണ്ടിക്കാട്ടി.
ജന്തർ മന്തറിൽ സാധ്യമല്ലെങ്കിൽ സമരം രാംലീല മൈതാനത്തേക്ക് മാറ്റാൻ അനുമതി നൽകണമെന്ന് അഭിഭാഷകൻ പ്രശാന്ത് ഭൂഷണും വാദിച്ചു. എന്നാൽ ജന്തർ മന്തറിന് വലിയ തോതിലുള്ള പ്രായോഗിക പരിമിതികളുണ്ടെന്ന് ചീഫ് ജസ്റ്റിസ് നിരീക്ഷിച്ചു.
ഒട്ടേറെ കേന്ദ്ര സർക്കാർ ഓഫീസുകളും പാർലമെന്റ് അംഗങ്ങളുടെ വസതികളും സ്ഥിതിചെയ്യുന്ന ഈ മേഖലയിൽ നിയന്ത്രണങ്ങൾ ഏർപ്പെടുത്തുന്നത് സാധാരണ ജനജീവിതത്തെയും പ്രതികൂലമായി ബാധിക്കുന്നുണ്ട്.
കൂടാതെ സമരക്കാർക്ക് പ്രാഥമിക ആവശ്യങ്ങൾ നിറവേറ്റാനുള്ള ശുചിമുറികൾ പോലുമില്ലെന്ന് കോടതി ഓർമ്മിപ്പിച്ചു. അടിയന്തര സാഹചര്യങ്ങളിൽ ജന്തർ മന്തറിലേക്ക് ആംബുലൻസുകൾ എത്തിക്കാനോ വൈദ്യസഹായം ലഭ്യമാക്കാനോ സാധിക്കാത്ത വിധം ഇടുങ്ങിയതാണ് അവിടുത്തെ വഴികളെന്ന് സോളിസിറ്റർ ജനറലും വ്യക്തമാക്കി.
അതേസമയം, മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ശനിയാഴ്ച നടക്കാനിരിക്കുന്ന ‘ജന്തർ മന്തർ 2.0’ പ്രക്ഷോഭത്തിന് മുന്നോടിയായി നഗരത്തിൽ കടുത്ത നിയന്ത്രണങ്ങളാണ് പോലീസ് ഒരുക്കിയിട്ടുള്ളത്.
57 മെട്രോ സ്റ്റേഷനുകൾ പൂർണ്ണമായി അടച്ചിടാൻ പോലീസ് നൽകിയ മുൻ നിർദ്ദേശത്തിൽ സുപ്രീം കോടതി ഇടപെട്ടതോടെ അടച്ചിടുന്ന സ്റ്റേഷനുകളുടെ എണ്ണം 45 ആയി വെട്ടിച്ചുരുക്കി. ഒക്ടോബർ 10 ശനിയാഴ്ച വൈകിട്ട് ആറ് മണിവരെ ഈ മെട്രോ നിയന്ത്രണങ്ങൾ തുടരുമെന്നാണ് ഡി.എം.ആർ.സി വ്യക്തമാക്കിയത്.
ഇതിനുപുറമെ ക്രമസമാധാന പാലനം മുൻനിർത്തി ജന്തർ മന്തറിന് ചുറ്റുമുള്ള നാല് കിലോമീറ്റർ ചുറ്റളവിൽ മൊബൈൽ ഇന്റർനെറ്റ് സേവനങ്ങൾ പൂർണ്ണമായും വിച്ഛേദിക്കാനും അധികൃതർ ഉത്തരവിട്ടിട്ടുണ്ട്.
