പശ്ചിമ ബംഗാൾ വോട്ടർ പട്ടിക പുനരവലോകന അപ്പീലുകൾ തീർപ്പാക്കുന്നതിൽ കാലതാമസം വരുത്തുന്ന പോർട്ടലിലെ ആധാർ പരിശോധന ഉടൻ പരിഹരിക്കണമെന്ന് തിരഞ്ഞെടുപ്പ് കമ്മീഷനോട് ആവശ്യപ്പെട്ട് ട്രൈബ്യൂണൽ ജഡ്ജിമാർ; മോശം തൊഴിൽ സാഹചര്യങ്ങൾക്കെതിരെയും ജഡ്ജിമാരുടെ പ്രതിഷേധം

കൊല്‍ക്കത്ത: പശ്ചിമ ബംഗാളിലെ വോട്ടര്‍ പട്ടിക പ്രത്യേക തീവ്ര പുനരവലോകനവുമായി ബന്ധപ്പെട്ട അപ്പീലുകള്‍ പരിഗണിക്കാന്‍ സുപ്രീം കോടതി നിയമിച്ച ട്രൈബ്യൂണല്‍ ജഡ്ജിമാര്‍, തിരഞ്ഞെടുപ്പ് കമ്മീഷന്റെ പോര്‍ട്ടലിലെ ആധാര്‍ പരിശോധന കാരണം അന്തിമ ഉത്തരവുകള്‍ വൈകുന്നുവെന്ന് ചൂണ്ടിക്കാട്ടി.

കഴിഞ്ഞ നാല് ആഴ്ചയ്ക്കിടെ രണ്ട് തവണയാണ് ജഡ്ജിമാര്‍ ഇക്കാര്യം കമ്മീഷന്റെ ശ്രദ്ധയില്‍പ്പെടുത്തിയത്.

ദ ഇന്ത്യന്‍ എക്‌സ്പ്രസ് പുറത്തുവിട്ട ഔദ്യോഗിക രേഖകള്‍ പ്രകാരം, സെപ്റ്റംബറിലും രണ്ട് ആഴ്ച മുമ്പുമാണ് അപ്പീലുകളില്‍ ഉത്തരവുകള്‍ പുറപ്പെടുവിക്കുന്നതിന് ആധാര്‍ ഓതന്റിക്കേഷന്‍ നിര്‍ബന്ധമാക്കിയതിനെതിരെ ജഡ്ജിമാര്‍ എതിര്‍പ്പ് പ്രകടിപ്പിച്ചത്. 

സെപ്റ്റംബര്‍ 21-ന് ആധാര്‍ ഓതന്റിക്കേഷന്‍ സ്‌ക്രീന്‍ അവതരിപ്പിച്ച് മൂന്ന് ദിവസത്തിന് ശേഷം, അതായത് സെപ്റ്റംബര്‍ 24-ന് ഇത് നീക്കം ചെയ്യണമെന്ന് ആവശ്യപ്പെട്ട് ജഡ്ജിമാര്‍ തിരഞ്ഞെടുപ്പ് പാനലിന് കത്തയച്ചിരുന്നു. 

തുടര്‍ന്ന് ഒക്ടോബര്‍ 13-നും ട്രൈബ്യൂണല്‍ ചുമതലയുള്ള ഉദ്യോഗസ്ഥന്‍, ട്രൈബ്യൂണലുകളുടെ സുഗമമായ പ്രവര്‍ത്തനത്തിനും അന്തിമ ഉത്തരവുകള്‍ അപ്ലോഡ് ചെയ്യുന്നതിനും ഈ പ്രശ്‌നം പരിഹരിക്കാന്‍ കമ്മീഷനോട് ആവശ്യപ്പെട്ടതായി രേഖകള്‍ വ്യക്തമാക്കുന്നു.

ഇതിനുപുറമെ, ട്രൈബ്യൂണലുകളിലെ അപര്യാപ്തമായ തൊഴില്‍ സാഹചര്യങ്ങളെക്കുറിച്ചും ജഡ്ജിമാര്‍ തിരഞ്ഞെടുപ്പ് കമ്മീഷനെയും കല്‍ക്കട്ട ഹൈക്കോടതിയെയും അറിയിച്ചിട്ടുണ്ട്. ഒക്ടോബര്‍ ഒന്നിന് അയച്ച കത്തില്‍, ഏഴോ എട്ടോ ജീവനക്കാര്‍ക്കൊപ്പം ഇടുങ്ങിയ മുറികളില്‍ ജോലി ചെയ്യാന്‍ നിര്‍ബന്ധിതരാകുന്നുവെന്ന് പത്ത് ജഡ്ജിമാര്‍ ചൂണ്ടിക്കാണിച്ചു. 

സ്റ്റേഷനറിയുടെ കുറവും ശുചിമുറി സൗകര്യങ്ങളുടെ അപര്യാപ്തതയും അവര്‍ എടുത്തുപറഞ്ഞു. നിലവിലുള്ള 25,000 രൂപയുടെ ഓണറേറിയം തങ്ങളുടെ പദവിക്ക് അനുയോജ്യമല്ലെന്നും അതിനാല്‍ ഇത് ഇരട്ടിയായി വര്‍ദ്ധിപ്പിക്കണമെന്നും ജഡ്ജിമാര്‍ ആവശ്യപ്പെട്ടതായി ദ ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തു.