ലണ്ടനിൽ ലൈംഗികാക്രമണ കേസിൽ പിടിയിലായ പ്രമുഖ ഇന്ത്യൻ അഭിഭാഷകൻ വിജയ് അഗർവാളിനെതിരെ കൂടുതൽ ഗുരുതരമായ ബലാത്സംഗ കുറ്റങ്ങൾ ചുമത്തി യുകെ പ്രോസിക്യൂഷൻ: വ്യക്തിഗത അസിസ്റ്റന്റായി ജോലി വാഗ്ദാനം ചെയ്ത് യുവതികളെ ചൂഷണം ചെയ്ത കേസിൽ വിചാരണ നടപടികൾ നവംബർ 6-ലേക്ക് മാറ്റി; പ്രതിയുടെ ജാമ്യാപേക്ഷ കോടതി തള്ളി
Current: മലയാളം
ലണ്ടന്‍: ലണ്ടനില്‍ ലൈംഗികാക്രമണ കേസില്‍ ജുഡീഷ്യല്‍ കസ്റ്റഡിയില്‍ കഴിയുന്ന പ്രമുഖ ഇന്ത്യന്‍ അഭിഭാഷകന്‍ വിജയ് അഗര്‍വാളിനെതിരെ കൂടുതല്‍ ഗുരുതരമായ ബലാത്സംഗ കുറ്റങ്ങളും ചുമത്തിയതായി വെളിപ്പെടുത്തല്‍.
വെള്ളിയാഴ്ച യുകെയിലെ കോടതിയില്‍ നടന്ന വാദത്തിനിടെയാണ് ക്രിസ്ത്യന്‍ പ്രോസിക്യൂഷന്‍ സര്‍വീസ് 57കാരനായ അഗര്‍വാളിനെതിരെ ബലാത്സംഗ കുറ്റവും ചൂഷണം ചെയ്യുകയെന്ന ലക്ഷ്യത്തോടെ മറ്റൊരു വ്യക്തിയുടെ യാത്ര ക്രമീകരിക്കുകയോ സുഗമമാക്കുകയോ ചെയ്‌തെന്ന കുറ്റവും ഔദ്യോഗികമായി ചുമത്തിയത്.
കേസില്‍ ഉള്‍പ്പെട്ട അദ്ദേഹത്തിന്റെ സഹായി മന്‍പ്രീത് കൗര്‍ സമാനമായ കുറ്റാരോപണം നേരിടുന്നുണ്ട്; കൂടാതെ ഇതേ കേസില്‍ അറസ്റ്റിലായ മൂന്നാം പ്രതി ഹര തിബ്രേവാല വെസ്റ്റ്മിന്‍സ്റ്റര്‍ മജിസ്‌ട്രേറ്റ് കോടതിയില്‍ ഹാജരായി കുറ്റങ്ങള്‍ നിഷേധിക്കുകയും കര്‍ശന ഉപാധികളോടെ ജാമ്യം നേടുകയും ചെയ്തു.
അഗര്‍വാളും കൗറും തിബ്രേവാലയും നവംബര്‍ 6-ന് സൗത്ത്വാര്‍ക്ക് ക്രൗണ്‍ കോടതിയില്‍ നടക്കുന്ന വിചാരണ വാദത്തിനായുള്ള നടപടികളില്‍ പങ്കെടുക്കും.
ഇന്ത്യക്കാരനായ മെഹുല്‍ ചോക്‌സി ഉള്‍പ്പെടെയുള്ള പ്രമുഖര്‍ക്കുവേണ്ടി ഹാജരായിട്ടുള്ള ഡല്‍ഹി അഭിഭാഷകനായ വിജയ് അഗര്‍വാളും മന്‍പ്രീത് കൗറും (41) കഴിഞ്ഞ ഓഗസ്റ്റ് 11-ന് ലണ്ടനിലെ മേഫെയര്‍ പ്രദേശത്ത് വെച്ചാണ് അറസ്റ്റിലായത്.
വ്യക്തിഗത അസിസ്റ്റന്റിന്റെ മറവില്‍ പെണ്‍കുട്ടികളെ റിക്രൂട്ട് ചെയ്ത് ലൈംഗികമായി ചൂഷണം ചെയ്യാന്‍ ശ്രമിച്ചുവെന്നാണ് ഇയാള്‍ക്കെതിരെയുള്ള ആരോപണം. വിചാരണ വേളയില്‍ രാജ്യം വിട്ടുപോകാന്‍ സാധ്യതയുണ്ടെന്നും യുകെയില്‍ വേരുകളില്ലെന്നും ചൂണ്ടിക്കാട്ടി കോടതി നേരത്തെ അദ്ദേഹത്തിന്റെ ജാമ്യാപേക്ഷ തള്ളിയിരുന്നു.
