വെള്ളാരംകല്ലിൽ വീണ ഇയർബഡ്; അഞ്ച് മിനിറ്റിനുള്ളിൽ കണ്ടെത്തി ChatGPT! സോഷ്യൽ മീഡിയയിൽ ചർച്ച | ChatGPT finds lost earbud

ചെറിയൊരു വയർലെസ് ഇയർബഡ് നഷ്ടപ്പെട്ടപ്പോൾ തിരച്ചിൽ അവസാനിപ്പിച്ച് ChatGPTയുടെ സഹായം തേടി യുവാവ്. അഞ്ച് മിനിറ്റിനുള്ളിൽ ഇയർബഡ് കണ്ടെത്തിയ അനുഭവം റെഡ്ഡിറ്റിൽ പങ്കുവച്ചതോടെ സംഭവം സമൂഹമാധ്യമങ്ങളിൽ ശ്രദ്ധ നേടുകയാണ്. ആർട്ടിഫിഷ്യൽ ഇന്റലിജൻസ് (എഐ) ഉപയോഗിച്ച് ദൈനംദിന പ്രശ്നങ്ങൾ പരിഹരിക്കാമെന്നതിന്റെ രസകരമായ ഉദാഹരണമായാണ് നിരവധി പേർ ഇതിനെ കാണുന്നത്. (ChatGPT finds lost earbud)

ബോസ് കമ്പനിയുടെ വയർലെസ് ഇയർബഡുകളാണ് യുവാവ് ഉപയോഗിച്ചിരുന്നത്. ഹൂഡിയിൽനിന്ന് ഒരു ഇയർബഡ് പുറത്തേക്ക് വീണ് വെള്ള നിറത്തിലുള്ള ചരൽക്കല്ലുകൾക്കിടയിലേക്ക് തെറിച്ചുപോവുകയായിരുന്നു. പത്തുമിനിറ്റോളം തിരഞ്ഞിട്ടും കണ്ടെത്താനാകാതെ വന്നതോടെ, ഇതിന്റെ ചിത്രം ChatGPTയ്ക്ക് നൽകി സഹായം തേടാൻ തീരുമാനിച്ചു. ഇയർബഡ് ചെവിയിൽ വയ്ക്കുന്നതുവരെ ഫോണുമായി സാധാരണ രീതിയിൽ കണക്ട് ചെയ്യാത്തതിനാൽ ബ്ലൂടൂത്ത് വഴി ശബ്ദം കേൾപ്പിച്ച് കണ്ടെത്താനുള്ള മാർഗവും ലഭ്യമായിരുന്നില്ലെന്ന് യുവാവ് പറഞ്ഞു. എന്നാൽ ചിത്രം പരിശോധിച്ച ChatGPT, ഇയർബഡ് കിടക്കുന്ന കൃത്യമായ സ്ഥലം ചൂണ്ടിക്കാട്ടി. ചിത്രം അപ്‌ലോഡ് ചെയ്തതുമുതൽ ഇയർബഡ് കൈയിലെത്തുന്നതുവരെ അഞ്ച് മിനിറ്റിൽ താഴെ മാത്രമാണ് എടുത്തതെന്നും യുവാവ് വ്യക്തമാക്കി.

ChatGPT found my lost earbud
by
u/Just_a_fungi893 in
ChatGPT

റെഡ്ഡിറ്റിൽ പങ്കുവച്ച പോസ്റ്റിന് 2,800ലധികം അപ്‌വോട്ടുകൾ ലഭിച്ചു. ചിത്രങ്ങൾ കൂടുതൽ സൂക്ഷ്മമായി പരിശോധിക്കാനും സൂം ചെയ്ത് വിശദാംശങ്ങൾ കണ്ടെത്താനുമുള്ള എഐയുടെ കഴിവാണ് ഈ സംഭവത്തിൽ പ്രയോജനപ്പെട്ടതെന്ന് ചിലർ അഭിപ്രായപ്പെട്ടു. ദൈനംദിന ജീവിതത്തിലെ ചെറിയ പ്രശ്നങ്ങൾ പരിഹരിക്കാൻ എഐയെ എങ്ങനെ ഉപയോഗിക്കാമെന്നതിന്റെ മികച്ച ഉദാഹരണമാണിതെന്നും നിരവധി പേർ പ്രതികരിച്ചു.

Summary: A Reddit user found a lost Bose wireless earbud in less than five minutes after uploading a photo to ChatGPT. The incident attracted attention online, with users praising AI’s ability to identify small objects in cluttered surroundings.