നെതന്യാഹുവിന്റെ മകന് വധഭീഷണി! മിയാമിയിൽ നിന്ന് അടിയന്തരമായി ഇസ്രയേലിലേക്ക്; സുരക്ഷാ സംഘത്തോടൊപ്പം മാറ്റി

വധഭീഷണി ഗൗരവമുള്ളതെന്ന് വിലയിരുത്തിയതിന് പിന്നാലെ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ മകൻ യെയർ നെതന്യാഹുവിനെ മിയാമിയിൽ നിന്ന് അടിയന്തരമായി ഇസ്രയേലിലേക്ക് മാറ്റി. ജീവന് “ഗണ്യമായ ഭീഷണി”യുണ്ടെന്ന വിലയിരുത്തലിനെ തുടർന്നാണ് ഇസ്രയേൽ ആഭ്യന്തര രഹസ്യാന്വേഷണ ഏജൻസിയായ ഷിൻ ബെറ്റ് സുരക്ഷാ സംഘത്തോടൊപ്പം യെയറിനെ നാട്ടിലേക്ക് എത്തിച്ചത്. അടിയന്തരമായി പുറപ്പെട്ടതിനാൽ വ്യക്തിപരമായ സാധനങ്ങൾ പോലും മിയാമിയിൽ ഉപേക്ഷിച്ചാണ് യാത്ര ചെയ്തതെന്നാണ് റിപ്പോർട്ട്.

ഭീഷണിയുടെ ഉറവിടമോ സ്വഭാവമോ ഷിൻ ബെറ്റ് വ്യക്തമാക്കിയിട്ടില്ല. അതേസമയം, യെയർ ഇറാന്റെ വധശ്രമ ഗൂഢാലോചനയുടെ ലക്ഷ്യമായിരുന്നുവെന്ന് യുഎസ് മാധ്യമമായ ന്യൂസ്മാക്സിന്റെ റിപ്പോർട്ട് നേരത്തെ പുറത്തുവന്നിരുന്നു. 2025 ഡിസംബറിൽ യെയർ ഫ്ലോറിഡയിൽ താമസിച്ചിരുന്ന സമയത്താണ് ഇതുമായി ബന്ധപ്പെട്ട നീക്കമുണ്ടായതെന്നാണ് റിപ്പോർട്ട്. പിന്നാലെ നെതന്യാഹുവും തന്റെ ഒരു മകനെ ഇറാൻ ലക്ഷ്യമിട്ട് കൊലപ്പെടുത്താൻ ശ്രമിച്ചുവെന്ന് ആരോപിച്ചിരുന്നു.

ALSO READ;‘ചതിയന്മാരുടെ ലോകം’..! അമേരിക്കയ്ക്കും ഇസ്രയേലിനുമെതിരെ മുസ്‌ലിം രാജ്യങ്ങൾ ഒന്നിക്കണമെന്ന് മൊജ്തബ ഖമേനി

ഇസ്രയേൽ മാധ്യമമായ ചാനൽ 12ന്റെ റിപ്പോർട്ട് പ്രകാരം, യെയറിനെ മാറ്റുന്നതിനുള്ള നടപടിക്കായി ന്യൂയോർക്കിൽനിന്ന് ചില ഷിൻ ബെറ്റ് ഉദ്യോഗസ്ഥരെയും എത്തിച്ചിരുന്നു. അമേരിക്കയിലെ മിയാമിയിൽ വർഷങ്ങളായി താമസിച്ചുവരികയായിരുന്നു യെയർ. ആഡംബര ജീവിതവും സർക്കാർ ചെലവിലുള്ള സുരക്ഷയും നേരത്തെ ഇസ്രയേലിൽ ചർച്ചയായിട്ടുണ്ട്. 2023 ഒക്ടോബർ 7ന് ഹമാസ് ആക്രമണത്തെ തുടർന്ന് യുദ്ധം ആരംഭിച്ച ശേഷവും യെയർ വിദേശത്ത് തുടരുന്നതിനെതിരെ വിമർശനങ്ങളും ഉയർന്നിരുന്നു.

യെയർ നെതന്യാഹു കൺസർവേറ്റീവ് പോഡ്കാസ്റ്ററായും സമൂഹമാധ്യമ പ്രവർത്തകനായും അറിയപ്പെടുന്നു. പിതാവിന്റെ രാഷ്ട്രീയ എതിരാളികൾക്കെതിരെ പലപ്പോഴും രൂക്ഷമായ വിമർശനങ്ങൾ ഉന്നയിച്ചിട്ടുള്ള അദ്ദേഹം യൂറോപ്പിലെയും അമേരിക്കയിലെയും തീവ്ര വലതുപക്ഷ രാഷ്ട്രീയ നേതാക്കളുമായും പൊതുപ്രവർത്തകരുമായും ബന്ധം പുലർത്തിയിട്ടുമുണ്ട്. നിലവിലെ ഭീഷണിയുടെ കൂടുതൽ വിശദാംശങ്ങൾ ഷിൻ ബെറ്റ് പുറത്തുവിട്ടിട്ടില്ലെങ്കിലും, സുരക്ഷാ വിലയിരുത്തലിന്റെ അടിസ്ഥാനത്തിൽ യെയറിനെ അടിയന്തരമായി ഇസ്രയേലിലേക്ക് മാറ്റിയിരിക്കുകയാണ്.

The post നെതന്യാഹുവിന്റെ മകന് വധഭീഷണി! മിയാമിയിൽ നിന്ന് അടിയന്തരമായി ഇസ്രയേലിലേക്ക്; സുരക്ഷാ സംഘത്തോടൊപ്പം മാറ്റി appeared first on Express Kerala.