വൻ പ്രതീക്ഷയിൽ എത്തിയ ‘ടോക്സിക്’ക്ക് ബോക്സോഫീസിൽ തിരിച്ചടി; ഒടിടി ഓഫറും കുത്തനെ കുറഞ്ഞു | Toxic movie

കൊച്ചി: ഗീതു മോഹൻദാസ് സംവിധാനം ചെയ്ത് യാഷ് നായകനായെത്തിയ ‘ടോക്സിക്: എ ഫെയറി ടെയിൽ ഫോർ ഗ്രോൺ-അപ്സ്’ വൻ പ്രതീക്ഷകളോടെയാണ് തിയറ്ററുകളിലെത്തിയത് (Toxic movie). നയൻതാര, കിയാര അദ്വാനി, താര സുതാര്യ, ഹുമ ഖുറേഷി, രുഗ്മിണി വസന്ത് തുടങ്ങിയ താരനിര അണിനിരന്ന ചിത്രത്തിന് ഈ വർഷത്തെ വലിയ വിജയങ്ങളിലൊന്നാകുമെന്നായിരുന്നു വിലയിരുത്തലുകൾ. എന്നാൽ പ്രതീക്ഷിച്ച തരത്തിലുള്ള ബോക്സോഫീസ് പ്രകടനം കാഴ്ചവയ്ക്കാൻ ചിത്രത്തിന് സാധിച്ചില്ല.

റിലീസിന് മുമ്പ് ഒടിടി കരാർ ഉറപ്പിക്കാതിരുന്നതും ചിത്രത്തിന് തിരിച്ചടിയായെന്നാണ് റിപ്പോർട്ടുകൾ. റിലീസിന് മുൻപ് പ്രമുഖ ഒടിടി പ്ലാറ്റ്‌ഫോം ‘ടോക്സിക്’ ടീമിന് 150 കോടി രൂപയുടെ ഓഫർ നൽകിയിരുന്നുവെന്നാണ് വിവരം. എന്നാൽ ചിത്രം തിയറ്ററുകളിൽ വൻ വിജയമാകുമെന്ന പ്രതീക്ഷയിൽ നിർമ്മാതാക്കൾ 200 കോടി രൂപയാണ് ആവശ്യപ്പെട്ടത്.

പിന്നീട് ബോക്സോഫീസ് പ്രകടനം പ്രതീക്ഷയ്ക്കൊത്ത് ഉയരാതെ വന്നതോടെ ചിത്രത്തിന്റെ ഡിജിറ്റൽ അവകാശത്തിനായുള്ള ഓഫറുകളും കുറഞ്ഞു. നിലവിൽ എല്ലാ ഭാഷകളിലെയും ഒടിടി അവകാശത്തിനായി ഏകദേശം 30 കോടി രൂപയുടെ ഓഫറാണ് ലഭിക്കുന്നതെന്നാണ് റിപ്പോർട്ട്. സീ5 ആണ് നിലവിൽ ഏറ്റവും ഉയർന്ന തുക വാഗ്ദാനം ചെയ്തിരിക്കുന്നതെന്നും വിവരമുണ്ട്.

ഒടിടി റിലീസിനായി ചിത്രത്തിന്റെ പുതിയ എഡിറ്റ് തയ്യാറാക്കി ഡിജിറ്റൽ പ്ലാറ്റ്‌ഫോമുകൾക്ക് നൽകാനുള്ള ആലോചനയും അണിയറയിൽ നടക്കുന്നുണ്ടെന്നാണ് റിപ്പോർട്ടുകൾ. എന്നാൽ ഇതുസംബന്ധിച്ച് ഔദ്യോഗിക സ്ഥിരീകരണം പുറത്തുവന്നിട്ടില്ല.

ഇന്ത്യയിൽ എല്ലാ ഭാഷകളിലുമായി 101.10 കോടി രൂപയുടെ നെറ്റ് കളക്ഷനോടെയാണ് ‘ടോക്സിക്’ തിയറ്ററുകളിൽ മികച്ച തുടക്കം കുറിച്ചത്. എന്നാൽ തുടർന്നുള്ള ദിവസങ്ങളിൽ കളക്ഷനിൽ കാര്യമായ ഇടിവുണ്ടായി. റിലീസിന്റെ 12-ാം ദിവസം ചിത്രം നേടിയത് 2.42 കോടി രൂപ മാത്രമാണെന്നാണ് കണക്കുകൾ.

ഇതോടെ ഇന്ത്യയിലെ ചിത്രത്തിന്റെ ആകെ നെറ്റ് കളക്ഷൻ 245.75 കോടി രൂപയായി. ആഗോളതലത്തിൽ ചിത്രത്തിന്റെ ഗ്രോസ് കളക്ഷൻ 337.80 കോടി രൂപയിലെത്തിയതായാണ് റിപ്പോർട്ടുകൾ.

Story Summary:
Yash-starrer ‘Toxic: A Fairy Tale for Grown-Ups’, directed by Geetu Mohandas, has reportedly struggled at the box office despite a strong opening and a major star cast. The film’s reported OTT offer has also fallen sharply, from an earlier ₹150 crore offer to around ₹30 crore amid its underwhelming theatrical performance.