നിവിൻ പോളിയല്ല, ആദ്യം പരിഗണിച്ചത് ആസിഫ് അലിയെയും ടൊവിനോയെയും; വെളിപ്പെടുത്തലുമായി ‘ബെത്ലഹേം’ അണിയറപ്രവർത്തകർ
നിവിൻ പോളിയെ നായകനാക്കി ഗിരീഷ് എ.ഡി. സംവിധാനം ചെയ്ത ‘ബെത്ലഹേം കുടുംബ യൂണിറ്റ്’ തിയേറ്ററുകളിൽ വൻ വിജയം നേടി മുന്നേറുകയാണ്. റിലീസ് ചെയ്ത് 18 ദിവസം പിന്നിടുമ്പോൾ ആഗോളതലത്തിൽ 270 കോടി രൂപ സ്വന്തമാക്കിയ ചിത്രം, മലയാള സിനിമയുടെ ചരിത്രത്തിലെ രണ്ടാമത്തെ ഏറ്റവും വലിയ ബോക്സ് ഓഫീസ് വിജയമായി മാറി. ഭാവന സ്റ്റുഡിയോസിന്റെ ബാനറിൽ ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്.
ഇപ്പോഴിതാ ചിത്രത്തിൽ നിവിൻ പോളിക്ക് മുൻപ് ആസിഫ് അലിയെയും ടൊവിനോ തോമസിനെയും ആയിരുന്നു നായകന്മാരായി പരിഗണിച്ചിരുന്നതെന്ന് വെളിപ്പെടുത്തിയിരിക്കുകയാണ് അണിയറപ്രവർത്തകർ. ‘മിർച്ചി മലയാളത്തിന്’ നൽകിയ അഭിമുഖത്തിലാണ് ചിത്രത്തിന്റെ എഴുത്തുകാരൻ കിരൺ ജോഷിയും എഡിറ്റർ ആകാശ് ജോസഫ് വർഗീസും ഇക്കാര്യം വ്യക്തമാക്കിയത്. ചിത്രത്തിന്റെ കഥ ആദ്യം ആസിഫ് അലിയോടും ടൊവിനോ തോമസിന്റെ മാനേജരോടും പറഞ്ഞിരുന്നതായി ആകാശ് പറഞ്ഞു. എന്നാൽ ടൊവിനോയോട് നേരിട്ടാണോ സംസാരിച്ചതെന്ന് ഓർമ്മയില്ലെന്നും അദ്ദേഹം വ്യക്തമാക്കി.
Also Read:ബോക്സോഫീസിൽ കുതിച്ചുയർന്ന് ദുൽഖറിന്റെ ‘ഐ ആം ഗെയിം’; ആഗോള കളക്ഷൻ 41 കോടിയിലേക്ക്
ഏകദേശം മൂന്ന് നാല് വർഷം മുൻപ് മറ്റൊരു പ്രൊഡക്ഷൻ കമ്പനിക്ക് വേണ്ടിയാണ് ഈ ചിത്രം ആലോചിച്ചിരുന്നത് എന്ന് കിരൺ ജോഷി കൂട്ടിച്ചേർത്തു. പിന്നീട് പല മാറ്റങ്ങളിലൂടെയാണ് ഈ പ്രോജക്ട് ഭാവന സ്റ്റുഡിയോസിന്റെ കയ്യിലെത്തിയത്. ആ മാറ്റങ്ങൾക്കൊടുവിലാണ് നിവിൻ പോളി ചിത്രത്തിലേക്ക് നായകനായി എത്തിയതെന്നും കിരൺ പറഞ്ഞു. ‘തണ്ണീർമത്തൻ ദിനങ്ങൾ’, ‘സൂപ്പർ ശരണ്യ’, ‘പ്രേമലു’ എന്നീ സൂപ്പർഹിറ്റുകൾക്ക് ശേഷം ഗിരീഷ് എ.ഡി. ഒരുക്കിയ ഈ ചിത്രം ഇപ്പോൾ അന്യഭാഷകളിലും വലിയ ബോക്സ് ഓഫീസ് ചരിത്രം കുറിക്കാനുള്ള തയ്യാറെടുപ്പിലാണ്.
The post നിവിൻ പോളിയല്ല, ആദ്യം പരിഗണിച്ചത് ആസിഫ് അലിയെയും ടൊവിനോയെയും; വെളിപ്പെടുത്തലുമായി ‘ബെത്ലഹേം’ അണിയറപ്രവർത്തകർ appeared first on Express Kerala.
