ക്രൂഡ് ഓയിൽ വില ബാരലിന് 100 ഡോളറിന് മുകളിലേക്ക് കുതിച്ചുയർന്നു: പശ്ചിമേഷ്യയിലെ ഭൗമരാഷ്ട്രീയ സംഘർഷങ്ങൾ കടുക്കുന്നതിനിടെ ഇന്ത്യൻ ഓഹരി വിപണികളായ സെൻസെക്സിലും നിഫ്റ്റിയിലും വിറങ്ങലിച്ച തുടക്കം; നിക്ഷേപകരുടെ ആശങ്കയെ തുടർന്ന് 582 കോടിയുടെ ഓഹരികൾ വിറ്റഴിച്ച് വിദേശ ധനകാര്യ സ്ഥാപനങ്ങൾ; പ്രമുഖ ഏഷ്യൻ വിപണികളും നഷ്ടത്തിൽ
മുംബൈ: ആഗോള രാഷ്ട്രീയ സംഘര്ഷങ്ങളെ തുടര്ന്ന് അസംസ്കൃത എണ്ണവില ക്രൂഡ് ഓയില് വീണ്ടും ബാരലിന് 100 ഡോളറിന് മുകളിലേക്ക് ഉയര്ന്നതോടെ, ഭയത്തോടെയുള്ള നിക്ഷേപ അന്തരീക്ഷത്തില് വ്യാഴാഴ്ച വ്യാപാരത്തിന്റെ തുടക്കത്തില് ഇന്ത്യന് ഓഹരി വിപണികളായ സെന്സെക്സും നിഫ്റ്റിയും മാറ്റമില്ലാതെ നിശ്ചലമായി തുടരുന്നു.
തുടക്കത്തിലെ വ്യാപാരത്തില് ബി.എസ്.ഇ സെന്സെക്സ് 38.07 പോയിന്റ് മാത്രം ഉയര്ന്ന് 74,809.95 ലും, എന്.എസ്.ഇ നിഫ്റ്റി 9.85 പോയിന്റ് ഉയര്ന്ന് 23,439.20 ലും എത്തി.
ടെക് മഹിന്ദ്ര, ആക്സിസ് ബാങ്ക്, എസ്.ബി.ഐ, പവര് ഗ്രിഡ്, ഐ.ടി.സി, ഇന്ഫോസിസ് എന്നീ ഓഹരികള് നേട്ടമുണ്ടാക്കിയപ്പോള്, മഹിന്ദ്ര ആന്ഡ് മഹിന്ദ്ര, അദാനി പോര്ട്സ്, റിലയന്സ് ഇന്ഡസ്ട്രീസ്, സണ് ഫാര്മ തുടങ്ങിയ മുന്നിര ഓഹരികള് നഷ്ടത്തിലായി.
വിപണിയിലെ ആശങ്കകളെ തുടര്ന്ന് വിദേശ ധനകാര്യ സ്ഥാപനങ്ങള് ബുധനാഴ്ച മാത്രം 582.99 കോടി രൂപയുടെ ഓഹരികള് വിറ്റഴിച്ചു. ഏഷ്യന് വിപണികളായ കൊറിയന് കോസ്പി, ജപ്പാന് നിക്കേ, ഷാങ്ഹായ്, ഹോങ്കോങ് ഹാങ് സെങ് എന്നിവയും നഷ്ടത്തിലാണ് വ്യാപാരം തുടരുന്നത്.
