പാർക്കിങ് സ്ഥലങ്ങൾ കൂട്ടത്തോടെ വാങ്ങി; വാടക ഇരട്ടിയാക്കി, വിൽപ്പനയ്ക്ക് വൻവിലയും; ചൈനീസ് യുവതിയുടെ നിക്ഷേപം ചർച്ചയാകുന്നു | Chinese woman buys 196 parking spaces

ആരും വാങ്ങാൻ താൽപര്യം കാണിക്കാതിരുന്ന 196 പാർക്കിങ് സ്ഥലങ്ങൾ ഒരുമിച്ച് വാങ്ങി, പിന്നീട് വാടക ഇരട്ടിയാക്കി നൽകി ചൈനീസ് വനിത. താമസസമുച്ചയത്തിൽ പാർക്കിങ്ങിന് ആവശ്യക്കാർ കൂടിയതോടെ നിക്ഷേപം ലാഭകരമാക്കിയ വു എന്ന കുടുംബപ്പേരുള്ള വനിതയുടെ നടപടിയാണ് ഇപ്പോൾ ചർച്ചയാകുന്നത്. എന്നാൽ പാർക്കിങ് സ്ഥലങ്ങളുടെ വിലയും വാടകയും വർധിപ്പിച്ചതോടെ താമസക്കാർ പ്രതിഷേധവുമായി രംഗത്തെത്തി. ഒടുവിൽ കേസ് കോടതിയിലെത്തിയെങ്കിലും വാങ്ങൽ നിയമപരമാണെന്ന് കോടതി വിധിച്ചു. (Chinese woman buys 196 parking spaces)

ചൈനയിലെ ഹുനാൻ പ്രവിശ്യയിലെ ചാങ്ഷയിലാണ് സംഭവം. 2018-ൽ നിർമാണം പൂർത്തിയാക്കി വിൽപ്പനയ്ക്ക് വെച്ച താമസസമുച്ചയത്തിന് സമീപം കടകൾ, സ്കൂളുകൾ, പൊതുഗതാഗത സൗകര്യങ്ങൾ തുടങ്ങിയവ കുറവായിരുന്നതിനാൽ വീടുകൾക്കും പാർക്കിങ് സ്ഥലങ്ങൾക്കും ആവശ്യക്കാർ കുറവായിരുന്നു. ഈ സാഹചര്യത്തിലാണ് പ്രദേശത്തിന്റെ ഭാവിവികസന പദ്ധതികൾ പരിശോധിച്ച വു നിക്ഷേപത്തിന് തയ്യാറായത്. നിർമാണക്കമ്പനിയിൽനിന്ന് 196 പാർക്കിങ് സ്ഥലങ്ങൾ ഒരുമിച്ച് വാങ്ങിയ അവർ, പദ്ധതിയിലെ ആകെ പാർക്കിങ് സ്ഥലങ്ങളുടെ 40 ശതമാനത്തോളം സ്വന്തമാക്കി.
പ്രദേശത്ത് പിന്നീട് വികസനം വേഗത്തിലായി. താമസസമുച്ചയത്തിലെ വീടുകൾ വിറ്റുതീർന്നതോടെ വാഹനങ്ങൾ പാർക്ക് ചെയ്യാനുള്ള സ്ഥലങ്ങളുടെ ആവശ്യവും വർധിച്ചു. ഇതോടെ സ്വന്തം പാർക്കിങ് സ്ഥലങ്ങൾ മറ്റുള്ളവർ അനുമതിയില്ലാതെ ഉപയോഗിക്കുന്നത് തടയാൻ വു പാർക്കിങ് ലോക്കുകൾ സ്ഥാപിച്ചു. 2018-ൽ നിർമാണക്കമ്പനി നിശ്ചയിച്ചിരുന്ന നിരക്കിന്റെ ഇരട്ടിയായ പ്രതിമാസം 75 ഡോളറിനാണ് അവർ ചില പാർക്കിങ് സ്ഥലങ്ങൾ വാടകയ്ക്ക് നൽകിയത്. വാടക 300 യുവാനായി കുറയ്ക്കണമെന്ന താമസക്കാരുടെ ആവശ്യം അവർ അംഗീകരിച്ചില്ല.

പാർക്കിങ് സ്ഥലങ്ങൾ വിൽക്കുന്നതിനും വു ഉയർന്ന വില നിശ്ചയിച്ചു. ഓരോ സ്ഥലത്തിനും ഏകദേശം 15,000 ഡോളർ വരെ വിലയിട്ടതായാണ് റിപ്പോർട്ട്. ചില സ്ഥലങ്ങളുടെ വില യഥാർഥ വിലയേക്കാൾ 80 ശതമാനം വരെ കൂടുതലായിരുന്നു. പാർക്കിങ് സൗകര്യം ലഭിക്കാൻ ബുദ്ധിമുട്ടുന്ന താമസക്കാർ ഇതിനെതിരെ പ്രതിഷേധിച്ചു. സർക്കാർ ഉദ്യോഗസ്ഥൻ ഇടപെട്ട് തർക്കം പരിഹരിക്കാൻ ശ്രമിച്ചെങ്കിലും ഫലമുണ്ടായില്ല. തുടർന്ന് ഒരു വിഭാഗം താമസക്കാർ വുവും നിർമാണക്കമ്പനിയും തമ്മിലുള്ള വാങ്ങൽ കരാർ റദ്ദാക്കണമെന്ന് ആവശ്യപ്പെട്ട് കോടതിയെ സമീപിച്ചു.

എന്നാൽ 2024 ഫെബ്രുവരിയിൽ ചാങ്ഷയിലെ പ്രാദേശിക കോടതി വുവിന് അനുകൂലമായി വിധിച്ചു. പാർക്കിങ് സ്ഥലങ്ങൾ വിൽപ്പനയ്ക്ക് വെച്ചപ്പോൾ താമസക്കാർക്കും അവ വാങ്ങാൻ അവസരമുണ്ടായിരുന്നുവെന്നും എന്നാൽ അവർ അതിന് തയ്യാറായില്ലെന്നും കോടതി നിരീക്ഷിച്ചു. വിപണിയിലെ ഭാവിവികസനം കാത്തിരിക്കാതെ സ്വന്തം പണം മുടക്കി നിക്ഷേപം നടത്തിയതും അതിന്റെ അപകടസാധ്യത ഏറ്റെടുത്തതും വു ആണെന്നും കോടതി ചൂണ്ടിക്കാട്ടി. ഒരാൾക്ക് സ്വന്തമാക്കാവുന്ന പാർക്കിങ് സ്ഥലങ്ങളുടെ എണ്ണത്തിന് നിയമപരമായ നിയന്ത്രണമില്ലെന്നും വ്യക്തമാക്കിയ കോടതി, കൂട്ടത്തോടെ വാങ്ങിയ നടപടി നിയമവിരുദ്ധമല്ലെന്ന് വിധിച്ചു.

Summary: A Chinese woman surnamed Wu bought 196 parking spaces in a residential complex in Changsha, Hunan province, in 2018 when demand was low. As the neighbourhood developed, she reportedly doubled rental rates and listed some spaces for sale at significantly higher prices, prompting residents to take legal action. A local court ruled in her favour in February 2024, finding no law restricting the number of parking spaces an individual could own.