യാത്രയുമായി ബന്ധപ്പെട്ട റീഫണ്ട് ഇനി 14 ദിവസത്തിനകം; യൂറോപ്പിലെങ്ങും ഒരു അപേക്ഷാ ഫോം
Current: മലയാളം
ബ്രസല്‍സ്: യാത്രയുമായി ബന്ധപ്പെട്ട റീഫണ്ടിന് ഇനി യൂറോപ്പിലെങ്ങും ഒരു അപേക്ഷാ ഫോം.വിമാന യാത്രകള്‍ തടസ്സപ്പെട്ടാല്‍ പണം തിരികെ ലഭിക്കുന്നതിന് ഏകീകൃത ഫോം ഉപയോഗിക്കാമെന്ന നിയമം യൂറോപ്യന്‍ പാര്‍ലമെന്റ് അംഗീകരിച്ചു.
യാത്ര തടസ്സപ്പെടുന്ന സാഹചര്യങ്ങളില്‍ സഞ്ചാരികളുടെ അവകാശങ്ങള്‍ സംരക്ഷിക്കുന്നതിനുള്ള പുതിയ നിയമത്തിനാണ് യൂറോപ്യന്‍ പാര്‍ലമെന്റ് ഏറെക്കുറെ ഏകകണ്ഠമായി അംഗീകാരം നല്‍കിയത്.
പാര്‍ലമെന്റിലെ 652 പേര്‍ പുതിയ നിയമത്തെ അനുകൂലിച്ചു.രണ്ട് പേര്‍ എതിര്‍ത്തു.8 പേര്‍ വോട്ടെടുപ്പില്‍ നിന്ന് വിട്ടുനിന്നു. ജൂലൈയില്‍ അംഗീകരിച്ച, വിമാന യാത്രക്കാരുടെ അവകാശങ്ങള്‍ സംബന്ധിച്ച സമഗ്രമായ പരിഷ്‌കാരങ്ങളുടെ തുടര്‍ച്ചയാണ് ഈ നിയമം.
പണം തിരികെ ലഭിക്കുന്നത് എളുപ്പമാക്കിയ ഈ നിയമം ഓണ്‍ലൈന്‍ ടിക്കറ്റ് നിരക്കുകളില്‍ സൗജന്യമായി കൈവശം വെക്കാവുന്ന ഒരു ബാഗേജ് കൂടി ഉള്‍പ്പെടുത്തണമെന്ന് വിമാനക്കമ്പനികളോട് ആവശ്യപ്പെടുകയും ചെയ്തിരുന്നു.
ഏജന്‍സികള്‍ വഴി ടിക്കറ്റ് ബുക്ക് ചെയ്തവരാണെങ്കില്‍ പോലും, യൂറോപ്പിലുടനീളമുള്ള യാത്രക്കാര്‍ക്ക് 14 ദിവസത്തിനുള്ളില്‍ പണം പൂര്‍ണ്ണമായും തിരികെ ലഭിക്കാന്‍ അര്‍ഹതയുണ്ടാകും.ഭിന്നശേഷിക്കാരായ യാത്രക്കാരുടെ കൂടെ വരുന്നവര്‍ക്ക് സൗജന്യമായി യാത്ര ചെയ്യാനും പുതിയ നിയമം അനുവദിക്കുന്നു.
എല്ലാ യൂറോപ്യന്‍ ഭാഷകളിലും ഫോം ലഭിക്കും
യൂറോപ്യന്‍ യൂണിയനിലെ യാത്രക്കാര്‍ക്ക് പ്രത്യേക ഫോം ഉപയോഗിച്ച് പണം തിരികെ ആവശ്യപ്പെടാം. യൂറോപ്യന്‍ കമ്മീഷന്റെ വെബ്‌സൈറ്റില്‍ എല്ലാ യൂറോപ്യന്‍ യൂണിയന്‍ ഭാഷകളിലും ഈ ഫോം ലഭ്യമാകും. എല്ലാത്തരം ഗതാഗത മാര്‍ഗ്ഗങ്ങള്‍ക്കും ഇത് ബാധകമാകും.
14 ദിവസത്തിനുള്ളില്‍ പണം പൂര്‍ണ്ണമായും തിരികെ ലഭിക്കും. ട്രാവല്‍ ഏജന്റുമാര്‍ക്കും ഓണ്‍ലൈന്‍ ബുക്കിംഗ് പ്ലാറ്റ്‌ഫോമുകള്‍ പോലെയുള്ള ഇടനിലക്കാര്‍ക്കും ഈ പണം തിരികെ നല്‍കാനുള്ള ബാധ്യതയുണ്ടാകുന്നു. മുന്‍ നിയമങ്ങളില്‍ ഇക്കാര്യം വ്യക്തമായിരുന്നില്ല.
നിശ്ചിത സമയത്തിനുള്ളില്‍ ഇടനിലക്കാര്‍ പണം തിരികെ നല്‍കുന്നില്ലെങ്കില്‍ വിമാനക്കമ്പനികള്‍ ഇടപെടുകയും യാത്രക്കാരന് പണം നല്‍കുകയും വേണമെന്നും നിയമം വ്യവസ്ഥ ചെയ്യുന്നു.
വിമാനക്കമ്പനികളുടെ ലാഭത്തേക്കാള്‍ പൗരന്മാരുടെ അവകാശങ്ങള്‍ക്കാണ് മുന്‍ഗണന നല്‍കുന്നതെന്ന് നിയന്ത്രണങ്ങളുടെ ചുമതലയുള്ള ഇറ്റാലിയന്‍ സോഷ്യലിസ്റ്റ് നേതാവും യൂറോപ്യന്‍ പാര്‍ലമെന്റ് അംഗവുമായ മാറ്റിയോ റിച്ചി പറഞ്ഞു.
ഭിന്നശേഷിക്കാരായ ആളുകളുടെ അവകാശങ്ങളും ഈ നിയമം ശക്തിപ്പെടുത്തുന്നു. ബസുകള്‍, ട്രയിനുകള്‍, കപ്പലുകള്‍ എന്നിവയിലുള്ളതുപോലെ, വിമാനയാത്രയിലും ആവശ്യമെങ്കില്‍ ഭിന്നശേഷിക്കാരായ യാത്രക്കാര്‍ക്കൊപ്പം ഒരാള്‍ക്ക് സൗജന്യമായി യാത്ര ചെയ്യാം.
