‘വിരൽത്തുമ്പിൽ വേഷപ്പകർച്ചയുടെ വിസ്മയം’ കഥാപാത്രത്തെ അണിയിച്ചൊരുക്കി എം.രാജരാജേശ്വരി എന്ന കൊച്ചു കലാകാരി
പാലക്കാട് : നിറങ്ങളും ചായക്കൂട്ടുകളും കൈവിരലുകളിൽ വിസ്മയമൊരുക്കുമ്പോൾ, വേഷപ്പകർച്ചകളുടെ ലോകത്ത് സ്വന്തമായൊരു വിലാസം അടയാളപ്പെടുത്തുകയാണ് താനൂർ ഗവ.റീജനൽ ഫിഷറീസ് വൊക്കേഷനൽ ഹയർ സെക്കൻഡറി സ്കൂളിലെ പ്ലസ് വൺ വിദ്യാർത്ഥിനിയായ എം.രാജരാജേശ്വരി.
വെറും പതിനാറാം വയസ്സിൽ,തിരക്കഥകളിലെ കഥാപാത്രങ്ങൾക്കും അരങ്ങിലെ നർത്തകർക്കും ജീവൻ നൽകുന്ന പ്രഗൽഭയായ ചമയകലാകാരിയായി ഈ മിടുക്കി മാറിക്കഴിഞ്ഞു.
ചിത്രരശ്മി ബുക്സ് ഉടമ മിഥുൻ മനോഹറിന്റെയും എഴുത്തുകാരി ദിവ്യശ്രീയുടെയും മകളായ രാജരാജേശ്വരി,കോവിഡ് കാലത്തെ ഒഴിവുസമയങ്ങളിലാണ് ഓൺലൈൻ മേക്കപ്പ് ക്ലാസുകളിലൂടെ വർണ്ണങ്ങളുടെ ലോകത്തേക്ക് കൈവെക്കുന്നത്.
വധൂവരന്മാരെ ഒരുക്കിക്കൊണ്ട് തുടങ്ങിയ ഈ കൊച്ചു കലാകാരിയുടെ വിരൽസ്പർശം വളരെ പെട്ടെന്നാണ് സിനിമാ-നാടക ലോകത്തിന്റെ ശ്രദ്ധ പിടിച്ചുപറ്റിയത്.
വെല്ലുവിളികളെ അത്ഭുതമാക്കിയ ചമയകല
’സഖാവ് നാരായണി’ എന്ന ഹ്രസ്വചിത്രത്തിലൂടെയാണ് സിനിമയിലേക്കുള്ള തുടക്കം.ഒരു നായികയെത്തന്നെ 75 വയസ്സുള്ള വൃദ്ധയായും 25 വയസ്സുള്ള യുവതിയായും മാറ്റിയെടുത്ത രാജരാജേശ്വരിയുടെ കൈവഴക്കം ചലച്ചിത്ര പിന്നണി മേഖലയെ അത്ഭുതപ്പെടുത്തി.
പിന്നീട് ‘വിഭ്രാന്തം’,തമിഴ് ചിത്രമായ ‘സിദ്ധവേൽ’,’അപ്പുവിന്റെ അമ്മ’ തുടങ്ങി നിരവധി സിനിമകളിലും ഹ്രസ്വചിത്രങ്ങളിലും ഈ പതിനാറുകാരി തന്റെ ചായക്കൂട്ടുകളാൽ വിസ്മയം തീർത്തു.
അരങ്ങുകളിലെ നർത്തകർക്കും രാജരാജേശ്വരിയുടെ മേക്കപ്പ് കൂട്ട് പ്രിയപ്പെട്ടതാണ്.താനൂർ ശോഭപറമ്പ് ക്ഷേത്രത്തിൽ ഒരേസമയം ഇരുപതോളം നർത്തകരെയാണ് ഈ കൊച്ചുമിടുക്കി അണിയിച്ചൊരുക്കിയത്.
കൂടാതെ ഗുരുവായൂർ,തൃപ്രയാർ,കാടാമ്പുഴ തുടങ്ങി നിരവധി വേദികളിൽ ‘ശിവതാണ്ഡവം’ എന്ന നൃത്തനാടകത്തിനും ചമയമൊരുക്കി രാജരാജേശ്വരി കയ്യടി നേടി.
പഠനത്തോടൊപ്പം തന്റെ കലയോടുള്ള അടങ്ങാത്ത അഭിനിവേശവും കൂട്ടിച്ചേർത്ത്, വേഷപ്പകർച്ചകളുടെ ആകാശത്തേക്ക് ചിറകടിച്ചുയരുകയാണ് ഈ കൊച്ചു കലാകാരി
